Бугун, 27 февраль куни пойтахтимиздаги “Олимпия шаҳарчаси” спорт мажмуасида гандбол бўйича давом этаётган Ўзбекистон чемпионати 1-даврасининг олтинчи кунги ўйинлари бўлиб ўтади.

Аёллар жамоалари ўртасидаги баҳсларда Наманганнинг “Нам ДУ” жамоаси Жиззах билан, мағлубиятсиз юришини давом эттираётган тошкентлик гандболчи қизлар жамоаси “ОКМК” билан, Самарқанд жамоаси Хоразмнинг “Ranch” гандболчилари билан, навоийликлар эса Республика олимпия ва паралимпия спорт турлари маркази вакиллари билан куч синашади.

Кеча аёллар жамоалари ўртасида кечган ўйинларда Тошкент жамоаси ғолиблик анъанасига содиқ қолди. Пойтахтликлар бу сафар Навоий гандболчиларини 31:22 ҳисобида мағлуб этди. Шунингдек, қолган учрашувларда қўйидаги натижалар қайд этилди: Наманган – “Ranch” 35:41, “ОКМК” – Самарқанд 35:26, Жиззах – РОПСТТМ 27:32.

Эркаклар жамоалари ўртасида кеча якунланган баҳсларда пойтахтликлар Фарғонанинг "Қўқон ДУ" гандболчиларини 37:25 кўринишида енгди. Қолган ўйинларда эса натижалар қуйидаги кўринишни олди: Навоий вилояти – “Маъмун” 18:29, "БухДУ" – “Тер ДУ”  16:31,  Қорақалпоғистон Республикаси – “ОКМК” 30:31.

Айтиш лозим, эркаклар жамоалари ўртасида ортда қолган ўйинлар сарҳисобига кўра, ҳозирча Тошкент, “ОКМК”, Сурхондарёнинг “ТерДУ”  ва Хоразмнинг “Маъмун” жамоалари чемпионатнинг 1-давра ўйинларини мағлубиятсиз давом эттирмоқда.

Эртага, 28 февраль куни Ўзбекистон чемпионати 1-давра ўйинларининг сўнгги тур баҳслари ташкил этилади. Айнан шу куни эркаклар жамоалари ўртасида “ОКМК” – “Маъмун” ва Тошкент – “ТерДУ” жамоалари рўбарў келади.

<iframe width="650" height="420" src="https://www.youtube.com/embed/bJqR6RzKhFQ" title="G`oliblik an’anasini davom ettirayotgan Toshkent jamoasi “OKMK” to`sig`idan o`ta oladimi? " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Т.Рўзиев, А.Аҳмедов (видео), ЎзА