Мамлакатимизда ИИВ томонидан “Хавфсиз ва соғлом юрт” тезкор-профилактик тадбирининг иккинчи босқичи давом этмоқда. Унинг доирасида Тошкент вилояти ИИББ ва ДХХ ҳудудий бўлинмалари ходимлари ҳамкорлигида навбатдаги тезкор тадбир ўтказилди.

Унда контрабанда йўли билан олиб кирилган қарийб 2 килограмм гиёҳвандлик воситаси аниқланиб, ноқонуний муомалага киритилишининг олди олинди. Бекобод шаҳрида яшовчи, 2001 йили туғилган шахс (Т.А.) қўшни давлатдан контрабанда йўли билан олиб келинган, 945 грамм бўлган “гашиш” моддасини яширин жойдан олиб, 2002 йили туғилган таниши (Х.С.)га 100 АҚШ доллари эвазига топшираётган вақтда ҳар иккиси далилий ашё билан ушланди. 

Яна бир ҳолатда, 1995 йили туғилган шахс (М.Р.) Тожикистондан контрабанда йўли билан олиб кирилган, Бекобод шаҳридаги ўрмон хўжалиги ҳудудига яшириб қўйилган 1 килограмм “гашиш” гиёҳвандлик воситасини яширин жойдан олиб, етказиб бериш эвазига 1000 АҚШ долларини олаётган вақтида процессуал тартибда қўлга олинди. 

Олиб борилган терговга қадар текширувлар давомида аниқланишича, мазкур гиёҳвандлик воситалари наркокурьер томонидан контрабанда йўли билан “закладка” яъни яширин тарзда кўмилган ҳолатда қолдирилган. Мазкур ҳолатлар юзасидан ушланган шахсларга нисбатан Жиноят кодексининг тегишли моддаси билан жиноят иши қўзғатилиб, ҳозирда тергов ҳаракатлари олиб борилмоқда. 

А.Мусаев,ЎзА.