Юртимиз бўйлаб “Ёшлар орасида гиёҳвандлик ва психотроп моддаларнинг тарқалишига қарши курашиш” кенг қамровли тезкор-профилактик ойлиги ўтказилмоқда.

Айтиб ўтиш керакки, гиёҳвандлик ва наркожиноятчилик нафақат миллий, балки минтақавий ва глобал миқёсда хавфсизлик ва барқарорликка жиддий таҳдид солмоқда.  

Айниқса, ёшлар орасида турли наркотиклар истеъмоли учраётгани ёки уларнинг наркожиноятларга аралашиб қолиш ҳолатлари йилдан йилга ортиб бораётгани тарбиявий, тушунтирув ва бирламчи профилактик тадбирларни доимий равишда ўтказиб боришни тақозо этмоқда.

Давлатимиз раҳбарининг “Аҳоли саломатлиги ва миллат генофондини гиёҳвандлик ва наркожиноятлардан самарали ҳимоя қилиш бўйича комплекс чора-тадбирлар тўғрисида”ги фармони билан “Гиёҳвандлик ва наркожиноятларнинг барвақт олдини олиш ҳамда уларга қарши курашиш бўйича 2025-2026 йилларга мўлжалланган комплекс амалий ҳаракатлар миллий дастури” тасдиқланди.

Дастурда февраль ойида “Ёшлар орасида гиёҳвандлик ва психотроп моддаларнинг тарқалишига қарши курашиш” кенг қамровли тезкор-профилактик ойлигини ўтказиш вазифаси белгиланди.    

Ўзбекистон Миллий кино санъати саройида ўтказилган тадбирда мазкур ойликка расман старт берилди.  

Тадбирда 2025 йилда ҳуқуқ-тартибот идораларининг саъй-ҳаракатлари натижасида гиёҳвандлик воситалари, психотроп ва кучли таъсир қилувчи моддаларнинг ноқонуний муомаласи билан боғлиқ 15 минг 412 жиноят ва 1 минг 956 маъмурий ҳуқуқбузарлик аниқлангани қайд этилди. Уларнинг 59 нафарини мактаб ўқувчилари, 124 нафарини талабалар ташкил этган.  

Тезкор тадбирлар натижасида 3 тонна 413 кг. наркотик, психотроп ва кучли таъсир қилувчи моддаларнинг ноқонуний муомаласига чек қўйилиб, истеъмолга чиқиб кетишининг олди олинган.  

Наркотиклар ва ўқотар қуролларни назорат қилиш агентлиги томонидан Ички ишлар, Мактабгача ва мактаб таълими, Олий таълим, фан ва инновациялар, Соғлиқни сақлаш вазирликлари, Ёшлар ишлари агентлиги ва Маҳалла уюшмаси ҳамкорлигида ўтказилган тадбирда ойликни самарали ташкил этиш бўйича фикр алмашилди.  

Тошкент шаҳар ҳокимлиги билан ҳамкорликда “Ёшлар форуми” ўтказилди. Форумни ёш ижодкорлар томонидан яратилган “Бадал” номли қисқа метражли фильм премьераси очиб берди.  

Тадбирда  “Антинарко” ёшлар фронт офиси тақдимоти ўтказилди. Форум давомида Ёшлар ишлари агентлиги фаоллари томонидан “Мини музей” ва “Блиц” қизиқарли савол-жавоб викториналари ташкил этилиб, ғолиблар эсдалик совғалари билан тақдирланди.  

<iframe width="650" height="420" src="https://www.youtube.com/embed/HEf4YxQqXCc" title="Giyohvandlik va psixotrop moddalarning tarqalishiga qarshi kurashish oyligi boshlandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Н.Абдураимова,

Д.Ёқубов (видео),

А.Аҳмедов (монтаж), ЎзА