Бугунги кунда Ўзбекистонда турли соҳалар учун яратилаётган қулай сармоявий муҳит, инвесторларга берилаётган имтиёзлар дунё давлатларининг кўплаб компанияларини юртимизга жалб этмоқда.

Хусусан, Германиянинг «Berlin-Chemie» компанияси вакиллари ва Фармацевтика тармоғини ривожлантириш агентлиги ўртасида бўлиб ўтган учрашув ўзаро ҳамкорликни йўлга қўйишга қаратилди.  

"Berlin-Chemie" компанияси асосан сурункали касалликларни даволашда ишлатиладиган дори воситаларини ишлаб чиқарувчи ҳисобланади. Мазкур компания вакиллари учрашувда дастлаб Ўзбекистон фармацевтика соҳасидаги қулай сармоявий муҳит, инвесторлар учун яратилган имтиёз ва преференциялар билан танишди.  

Компания раҳбари Ҳеико Счвэигелнинг таъкидлашича, уларнинг Ўзбекистон фармацевтика бозорига қизиқиши катта бўлиб, мамлакатимизнинг Марказий Осиёдаги географик жиҳатдан қулай жойлашуви, қўшни давлатларга экспортни амалга ошириш учун яратилган имкониятлар уларни бу бозорга киришга рағбатлантирган.  

Шу боис келгусида «Berlin-Chemie» компанияси фарм маҳсулотларни Ўзбекистонда тўлов-шартнома асосида ишлаб чиқаришни режалаштирмоқда.  

Фармацевтика тармоғини ривожлантириш агентлиги директори Абдулла Азизов хорижий компания вакилларига R&D (тадқиқот ва ишланмалар) соҳасида тажриба алмашиш таклифини берди.  

Агентлик маълумотига кўра учрашув якунига кўра, ҳамкорлик истиқболлари ва қўшма лойиҳаларни амалга ошириш бўйича кейинги қадамларни қўйиш масалалари муҳокама қилинган.  

Абдулазиз РУСТАМОВ, ЎзА