Айни кунларда Германиянинг Роберт Кох институти тажрибали мутахассислари юртимизда бўлиб, пандемияга қарши курашда мамлакатимиз тиббиёт ходимларига кўмаклашмоқда.

Юртимиздаги коронавирус билан боғлиқ ҳозирги вазият мутахассислар томонидан таҳлил қилиниб, ўзаро тажриба алмашилмоқда. Хорижлик мутахассислар, жумладан, гуруҳ раҳбари Геральд Рипбергер Европа давлатлари “COVID-19”нинг иккинчи тўлқинини бошдан кечираётган бир пайтда Ўзбекистондаги ижобий кўрсаткичларни эътироф этди.

– Албатта, Европадаги вазият иқлим шароитлари, куннинг совуши билан боғлиқ, – дейди Геральд Рипбергер. – Аммо, шу билан биргаликда, бунга айрим одамларнинг ижтимоий масофани сақламай қўйгани, жамоат жойларида мунтазам ниқоб тақмаётгани ҳам сабаб бўлмоқда. Тушунамиз, одамлар карантин чораларидан бироз чарчашди. Лекин уларга амал қилмаслик яхши оқибатларга олиб келмайди.

Дарҳақиқат, мутахассис таъкидлаганидек, санитария қоидаларига риоя қилмаслик, айниқса, аҳолининг ниқоб тақмаслиги ҳар қандай мамлакатда иккинчи тўлқиннинг бошланишига сабаб бўлиши мумкин. Шу боис, ҳар биримиз жамоат жойларида ниқоб тақишимиз, ижтимоий масофани сақлашимиз, қўлларимизни тез-тез ювишимиз лозим.