Машҳур немис футболчиси ва тажрибали мураббий Ханс-Юрген Гёде Фарғонанинг “Нефтчи” футбол клуби бош мураббийи Исломбек Исмоиловнинг ёрдамчиси сифатида иш бошлади.

Вилоят ҳокими Хайрулло Бозоров Германиялик мутахассис билан учрашиб, келгусидаги режалар хусусида фикр алмашилди. 

Юрген Гёде ўзининг бой тренерлик фаолияти давомида Эроннинг “Персеполис”, Эрон ёшлар терма жамоаси, “Шахид Ганди”, “Истиқлол”, “Зоб Аҳан”, “Алюминиум”, Баҳрайннинг “Ал-Аҳли”, Малайзиянинг “Куала-Лумпур” каби клубларида бош мураббий ва ассистент сифатида фаолият юритган. Ўзбекистонда эса 2003 йилда U-19 терма жамоасини, 2004–2005 йилларда миллий терма жамоани бошқарган.

Сўнгги йилларда Юрген Гёде Вьетнам футбол федерациясида техник директор, “Вьеттел” клубида техник директор ва бош мураббий, “Биньзиюнг” жамоасида эса техник директор сифатида ишлаб келди.

Учрашувда “Нефтчи” жамоасини Осиё Чемпионлар Лигаси элит босқичида муносиб иштирок эттириш, замонавий, кучли ва ҳамжиҳат жамоа шакллантириш ҳамда жаҳон футболи тажрибаларини самарали жорий этиш масалалари муҳокама қилинди.

Германиялик мутахассис “Нефтчи” фаолиятини янги босқичга олиб чиқиш учун ўзининг бой тажрибаси ва билимларини тўлиқ сафарбар этишга тайёрлигини билдирди.

Германиялик тажрибали мутахассис Юрген Гёденинг жамоага қўшилиши “Нефтчи” учун халқаро тажрибани ошириш ва натижаларни янада яхшилашга хизмат қилиши кутилмоқда.

М.Сулаймонов, ЎзА