Германияның денсаулық сақтау министрі Карл Лаутербах елде маймыл шешегіне шалдыққандар үшін карантин енгізілгенін хабарлады.

«Бүгіннен бастап біз Роберт Кох институтының ұсыныстарын орындауға кірістік - маймыл шешегімен ауыратындар кем дегенде 21 күн оқшаулануы керек», - деген Лаутербах.

Оның айтуынша, маймыл шешегімен байланыста болғандарды оқшаулау «міндетті ұсынылады».

Адамдарда маймыл шешек ауруы осы уақытқа дейін негізінен Африканың кейбір бөліктерінде белгілі болды. 20 мамырда Германияда инфекцияның алғашқы жағдайы анықталды. Бұған дейін бұл жұқпалы аурудың бірнеше жағдайы Еуропада, соның ішінде Ұлыбритания, Португалия, Испания, Италия, Франция және Бельгияда байқалған болатын.

Қазірге дейін Еуропа мен Солтүстік Америкада адамдарда маймыл шешек жұқтырудың жүзден астам жағдайы тіркелді.