Олмалиқ кон-металлургия комбинати ҳамда Германия давлатининг бир қатор компаниялари ўртасида ўзаро манфаатли ҳамкорлик алоқалари йўлга қўйилган.

Самарқандда 2022 йилда бўлиб ўтган халқаро иқтисодий форумда Германиянинг BASF концерни, Helaba банки, “Menzel”, Takraf GmbH каби компаниялари билан бир қатор манфаатли шартномалар имзоланган эди.

Шунингдек, Чирчиқ шаҳрида комбинат ва Германия давлати билан ҳамкорликда “Deutsche IT-AGMK” қўшма корхонаси ҳам ташкил этилган. Бундан ташқари, жорий йилда янги барпо этилаётган 3-Мис бойитиш фабрикаси учун Германиянинг AUMUND Fördertechnik компанияси томонидан 54 дона занжир тасмали пластинасимон конвейр ленталарини ҳам етказиб берилиши режалаштирилган.

Йилдан йилга комбинат ва Германия компаниялари ўртасида ҳамкорлик алоқалари мустаҳкамланмоқда. Буни  жорий йилнинг 20 февраль куни “Mangold Consulting” консалтинг компанияси раиси, TUI AG кузатув кенгашининг раҳбари, профессор Клаус Мангольд бошчилигидаги Германия делегациясининг комбинатга ташрифи мисолида ҳам кўриш мумкин.

Меҳмонлар дастлаб, Қалмоққир, Ёшлик-1 конлари ҳамда Мис бойитиш фабрикасидаги технологик жараён ҳамда янги барпо этилаётган 3-Мис бойитиш фабрикасиниинг қурилиши билан танишди. Шу куни ОКМК раҳбарияти ва меҳмонлар ўртасида ўтказилган учрашувда келгусидаги ҳамкорликни кенгайтириш истиқболлари муҳокама қилинди.

ОКМК Ахборот хизмати

ЎзА