Ўзбекистоннинг Германиядаги элчихонаси матбуот хизматининг маълум қилишича, делегация таркиби қишлоқ хўжалиги техникаси, автомобилсозлик, озиқ-овқат ва тўқимачилик саноати, қурилиш материаллари ишлаб чиқариш, қишлоқ хўжалик маҳсулотларини қайта ишлаш, банк ва консалтинг хизматлари соҳаларида иш олиб бораётган 20 дан ортиқ немис компаниялари вакилларидан иборат.

Делегация аъзолари орасида “Commerzbank” ва “Landesbank Baden-Württemberg”, “Trützschler GmbH & Co. KG”, “Max Holder GmbH”, “ABM Anlagenbau und Maschinentechnik GmbH”, “Gühring GmbH”, “SR Business Germany”, “ITM Investment Trade Marketing GmbH”, “Rödl&Partner” и “RSP-i” каби етакчи банклар ва компаниялар вакиллари бор.

Германиялик ишбилармонларнинг бўлажак тадбирда иштирок этишдан мақсади Андижон вилоятининг инвестиция ва экспорт салоҳияти билан бевосита танишиш, шунингдек, маҳаллий тадбиркорлар билан тўғридан-тўғри алоқаларни ўрнатишдир.

Форум доирасида Германия ишбилармон доиралари вакиллари ўзбекистонлик шериклари билан G2B ва B2B форматларида икки томонлама учрашувлар ўтказиши режалаштирилган бўлиб, якунда аниқ инвестиция лойиҳалари ва экспорт шартномалари бўйича келишувларга эришиш кутилмоқда.

Германия компаниялари Қўрғонтепа туманида трикотаж фабрикасини модернизация қилиш ва тозаланган ўсимлик мойи ишлаб чиқариш заводини қуриш, Хўжаобод туманида транспорт-логистика марказини барпо этиш, Шаҳрихон туманида қуритилган мевалар ва зираворлар ишлаб чиқариш лойиҳаларида иштирок этмоқда.