Экономикалық дағдарыс Германия автосаласына ең ауыр соққы берді. Өткен жылдың өзінде салада 51,5 мыңға жуық жұмыс орны қысқартылды.

EY аудит компаниясы ұсынған «Сала барометрі» атты жаңа зерттеуге сәйкес, бұл көрсеткіш саладағы барлық жұмыс орындарының шамамен 7 пайызына тең.

Неміс автокөлік өндірушілері жағдайға үнемдеу шаралары арқылы жауап беруге мәжбүр. Германия автосаласына, әсіресе, неміс өндірушілері үшін негізгі экспорт нарығы саналатын Қытайдағы электромобильдер бумы қатты әсер етті.

Reuters дерегіне қарағанда, неміс компанияларының көбі қытайлық бәсекелестермен тең дәрежеде бәсекелесуге дайын емес.

Сонымен бірге Германия автосаласының жағдайына энергия бағасының өсуі, сондай-ақ АҚШ президенті Дональд Трамп әкімшілігі енгізген Еуропалық одақтан АҚШ-қа өнім импорттау тарифтері де кері ықпал еткен. EY зерттеуінде айтылғандай, Еуропа нарығындағы сұраныс әлі де 2019 жылғы деңгейден төмен қалып отыр.