Ўзбекистон Республикаси Фанлар академияси Геномика ва биоинформатика марказида “Генетика, геномика ва биотехнологияларнинг замонавий муаммолари” мавзусида VII Республика илмий-техник конференция бўлиб ўтди.

Конференцияда Ўзбекистон Республикасининг илмий ва таълим муассасалари олимлари ҳамда Россия Федерацияси, Беларусь, Украина ва Арманистондан 15 нафарга яқин илмий-тадқиқот марказлари тадқиқотчилари иштирок этди. 

Конференциянинг офлайн ва онлайн шаклда ташкил этилиши турли мамлакатлардан етакчи мутахассисларни жалб қилиш имкониятини берди.  

Фанлар академияси Геномика ва биоинформатика маркази директори Забардаст Бўриев Ўзбекистонда ўсимликлар геномикаси ва биотехнологияси ривожланиш тарихи, шунингдек мазкур соҳанинг ҳозирги ҳолати ва ривожланиш йўналишлари ҳақида ўз маърўзасини тақдим этди. 

Конференция геномика, протеомика, биоинформатика, инсон, ҳайвонлар ва ўсимликлар генетикаси; молекуляр биотехнология йўналишларида ўтказилди. Конференция иштирокчилари мазкур йўналишларнинг ривожланиши билан боғлиқ кенг кўламли масалаларга алоқадор илмий ишлар ҳақида сўз юритди. 

Шунингдек, иштирокчилар томонидан инновацион имкониятларга эга, келгусида ишлаб чиқаришга жорий этилиши мумкин бўлган ишлар ҳам тақдим этилди. 

Конференция якунида илмий анжуманга тақдим этилган инновацион ғояларнинг аксарияти ишлаб чиқаришга жорий этилиши эҳтимоли юқори экани айтиб ўтилди. Бундан ташқари хорижий иштирокчилар ўзбекистонлик олимлар билан ҳамкорликни янада ривожлантириш истагини билдирди. 

Муҳайё Тошқораева, ЎзА