Сўнгги йилларда Ўзбекистон халқаро иқтисодий ҳамкорликни кенгайтириш ва саноатнинг устувор соҳаларига хорижий инвестицияларни жалб этиш сиёсатини изчил олиб бормоқда. Мазкур йўналишда жаҳон автомобиль саноатида етакчи ўринни эгаллаган АҚШнинг “General Motors International” компанияси билан ҳамкорлик муҳим аҳамиятга эга.
Вашингтонга амалий ташриф доирасида давлатимиз раҳбари 6 ноябрь куни “General Motors International” компаниясининг глобал ижрочи директори Шилпан Аминни қабул қилди.
Учрашувда корпорация билан узоқ муддатли ҳамкорликни янада кенгайтириш, автомобилсозлик ва янги технологиялар соҳасида қўшма лойиҳаларни амалга ошириш масалалари муҳокама этилди. Президент Ўзбекистон автомобиль саноатини ривожлантириш ва диверсификация қилишда “General Motors” компанияси муҳим ўрин тутишини таъкидлади.
Сўнгги 5 йил ичида компания томонидан 1,6 миллион дона автомобиль ишлаб чиқарилди, Ўзбекистон “Chevrolet” бренди учун АҚШдан кейин иккинчи йирик бозорга ҳамда Марказий Осиё ва МДҲ бозорларида сотувлар бўйича етакчига айланди.
Бугунги глобал иқтисодиёт шароитида давлатлар ўртасидаги стратегик шерикликни мустаҳкамлаш кўп жиҳатдан саноат ва технологик ҳамкорлик даражасига боғлиқ. Шу нуқтаи назардан, Ўзбекистон Республикасининг “General Motors International” корпорацияси билан ҳамкорлиги нафақат иқтисодий, балки инновацияларни ривожлантириш, мамлакатнинг инвестициявий жозибадорлигини ошириш, Тошкент ва Вашингтон ўртасидаги ўзаро ишончни мустаҳкамлашга хизмат қилувчи сиёсий ва дипломатик омил сифатида алоҳида аҳамият касб этади.
Ўзбекистоннинг “General Motors” билан ҳамкорлиги ўн йилдан ортиқ тарихга эга бўлиб, миллий саноат корхоналари ва глобал автомобиль ишлаб чиқарувчилар ўртасидаги ҳамкорликнинг энг муваффақиятли намуналаридан ҳисобланади. “UzAuto Motors” қўшма корхонасининг ташкил этилиши маҳаллий автомобилсозлик саноатини ривожлантиришда муҳим қадам бўлиб, ишлаб чиқаришнинг халқаро стандартларини жорий этиш, маҳсулот сифатини ошириш ва маҳаллий автомобилларнинг экспорт салоҳиятини ошириш имконини берди.
“GMI” билан ҳамкорлик натижасида мамлакатимиз автомобилсозлик саноатини модернизация қилиш, уни минтақавий даражада рақобатбардош қилиш ҳамда халқаро ишлаб чиқариш занжирларига интеграция қилишга эришди. Бу ҳамкорлик миллий иқтисодиётга хорижий инвестицияларни самарали жалб этиш ва муваффақиятли саноат сиёсатининг ёрқин мисоли бўлди.
Хусусан, ташриф давомида эришилган келишувлар Ўзбекистон автомобилсозлик саноатини янада ривожлантириш ва модернизация қилиш, мамлакатимизнинг Марказий Осиё ва МДҲ бозорларидаги етакчи ўрнини мустаҳкамлашга қаратилган. Бундан ташқари, стратегик шерикликнинг ҳозирги юқори даражаси Ўзбекистонга “Chevrolet” автомобилларини сотиш ҳажми бўйича дунёда АҚШдан кейин иккинчи ўринни эгаллаш имконини берди. Бу маҳаллий машинасозликни қўллаб-қувватлаш ва илғор технологияларни жорий этиш бўйича изчил давлат сиёсатининг самарасидир.
Бугунги кунда асосий эътиборни инновацион ривожланиш, замонавий технологияларни жалб этишга қаратиш лозим. Ушбу устувор йўналишлар жаҳон автомобиль бозорида тобора кучайиб бораётган рақобат шароитида юқори ўринларни сақлаб қолиш имконини беради.
Бу борада ишлаб чиқариш ҳамкорлигини янада ривожлантириш, маҳсулотлар турини кенгайтириш ва маҳаллийлаштириш даражасини ошириш масалаларига алоҳида эътибор қаратилмоқда. Президентимиз Шилпан Амин билан учрашувда мамлакатимиздаги компонент базасини ривожлантириш ва янги иш ўринлари яратиш саноатни ривожлантириш стратегиясининг муҳим элементи эканини таъкидлади. Ўз навбатида, Шилпан Амин янги технологияларни жорий этиш, самарадорликни ошириш ва янги авлод моделларини ўзлаштириш йўналишларида фаол ҳамкорликни давом эттиришга тайёрлигини билдирди.
Ўзбекистон саноат салоҳиятини янада юксалтириш учун барча зарур шароитлар, жумладан ривожланган ишлаб чиқариш инфратузилмаси, малакали кадрлар, қулай инвестиция муҳитига эга. Шу боис, автомобилсозлик соҳасида илғор ечимларни ишлаб чиқиш ва жорий этишга қаратилган қўшма тадқиқот ва муҳандислик марказларини ташкил этиш муҳим вазифа ҳисобланади.
Замонавий шароитда ишлаб чиқарилаётган автомобилларнинг экологик хавфсизлиги ва энергия самарадорлиги тобора муҳим аҳамият касб этмоқда. Келгусида автомобиллар ишлаб чиқаришда айнан шу жиҳатларга эътибор қаратиш зарур.
Президент Шавкат Мирзиёев “яшил” иқтисодиётга ўтиш ва янги авлод технологияларини жорий этиш давлат сиёсатининг стратегик йўналиши эканини бир неча бор таъкидлаган. Бундай лойиҳаларнинг амалга оширилиши автомобилсозлик саноатининг экологик барқарорлигини ошириш имконини бериши билан бирга, фан, таълим ва юқори технологияли ишлаб чиқаришни ривожлантириш учун қўшимча рағбат яратади. Шу билан бирга, “GMI” билан ҳамкорликнинг экологик ва технологик йўналишлари иқтисодий ўсишнинг узоқ муддатли мақсадларига эришиш, саноатни диверсификация қилиш ва мамлакатни барқарор ривожлантириш мақсадларига эришишнинг асосий омилларидан бирига айланиши мумкин.
Ўзбекистон кўп йиллардан буён “General Motors International” учун “Chevrolet” брендининг глобал мавқеини мустаҳкамлашга ҳисса қўшадиган минтақадаги асосий ҳамкор бўлиб келмоқда. Ҳамкорликнинг янги стратегик даражага кўтарилиши ўзаро манфаатли бўлиб, инновациялар, технологик ривожланиш ва илғор технологик ҳамда экологик стандартларга жавоб берадиган замонавий саноат тизимини шакллантиришга йўналтирилган барқарор ва узоқ муддатли шерикликни янада мустаҳкамлашга хизмат қилади.
Хулоса қилиб айтганда, Ўзбекистон Президенти Шавкат Мирзиёевнинг АҚШга ташрифи, хусусан “General Motors International” раҳбарияти билан ўтказилган музокаралар иқтисодий алоқаларни мустаҳкамлашда навбатдаги муҳим қадам бўлиб, мамлакатнинг халқаро бизнес учун очиқлигини намоён этди.
“General Motors International” билан ҳамкорлик инновацияларни ривожлантириш, мамлакатнинг инвестициявий жозибадорлигини ошириш ва Ўзбекистоннинг халқаро майдонда ишончли ҳамкор сифатидаги мавқеини мустаҳкамлашга хизмат қилади.
Нодира Рашидова,
Ўзбекистон Республикаси
Олий Мажлиси Қонунчилик палатаси депутати.
ЎзА