Ғазо сектори марказий қисмидаги Нусайрат қочқинлар лагерида жойлашган БМТ мактабига берилган зарба натижасида 27 киши ҳалок бўлди, ўнлаб одам яраланди.

Фаластин ҳукуматининг Ғазодаги матбуот хизмати маълумотига кўра, Исроил кучлари БМТ Фаластинлик қочқинларга ёрдам кўрсатиш агентлигининг ўнлаб кўчирилган фуқароларга бошпана бўлаётган мактабига ҳужум қилди. Қурбонлар жасади Aл-Aқсо шаҳидлари касалхонасига етказилди.

Қайд этилишича, ярадорлар ва беморлар сони шифохона сиғимидан уч баробар кўп.

Фаластин ҳукумати баёнот орқали БМТ ва барча халқаро муассаса, ташкилотларни “Ғазо секторида бегуноҳ аҳоли – болалар ва аёлларга нисбатан геноцидни тўхтатиш учун Исроилга босим ўтказиш”га чақирган.