Ғазо ҳукумати маълум қилишича, Исроилнинг икки йиллик ҳужумларидан сўнг секторда 20 мингта портламаган ўқ-дорилар ва шунингдек, уйлар, бинолар ва иншоотларнинг тахминан 70 миллион тонна вайроналари қолган.

Сектор икки йил давомида Исроилнинг ҳаво ва қуролли ҳужумларига дуч келган энг йирик гуманитар фалокатни бошдан кечирмоқда. 

Расмий баёнотда айтилишича, Исроил томонидан амалга оширилган бомбардимонлардан сўнг секторда тахминан 20 мингта портламаган ўқ-дори қолган ва уларни йўқ қилиш учун махсус мутахассислар- сапёрлар гуруҳлари керак. Ҳукуматнинг таъкидлашича, вайроналарни тозалаш ишларида жиддий муаммоларга дуч келмоқда. Исроил қутқарув ва тиклаш ишлари учун зарур бўлган оғир техника ва жиҳозларни киритишга тўсиқ бўлмоқда. Ёпиқ чегара бўлимлари туфайли вайроналар остида қолган жасадларни чиқариш учун зарур техникани олиб келишнинг иложи йўқ. 

Шунингдек, Ғазо Соғлиқни сақлаш вазирлиги маълум қилишича, Исроил ҳали ҳам секторга зарбалар бермоқда. Вазирлик маълумотига кўра, сўнгги бир кеча-кундуз ичида 23 нафар фаластинлик ҳалок бўлган, яна 122 киши яраланган.

Икки йил давом этган Исроил ҳужумлари натижасида Ғазо секторида жами 67 967 нафар фаластинлик ҳалок бўлган, яна 170 179 нафар киши яраланган. 

9 октябрь куни АҚШ президенти Дональд Трамп Исроил ва ҲАМАС ҳаракати ўртасида ўт очишни тўхтатиш бўйича келишувнинг биринчи босқичи тасдиқланганини маълум қилди. Музокаралар Мисрда ўтказилган. Исроил ҳукумати келишувни тасдиқлагандан сўнг, у 10 октябрда кучга кирган. 

<iframe width="640" height="420" src="https://www.youtube.com/embed/qb1U1vUpjGo" title="G‘azoda minglab portlamagan snaryadlar qolgan" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов,

Улуғбек Тўхтаев, ЎзА