Ғазо секторидаги зиддият тобора чуқурлашиб, гуманитар ҳалокат даражасига етди. Сўнгги кунлардаги фожиавий воқеалар, жумладан, озиқ-овқат кутаётган тинч аҳоли устига ўқ ёғдирилиши низонинг зудлик билан тўхтатилиши зарурлигини яна бир бор кўрсатди.

Шанба куни Исроил аскарлари Ғазода озиқ-овқат олмоқчи бўлган фуқароларни ўққа тутиб, 32 кишини ўлдирди. Якшанба куни эса БМТ ёрдам карвонини кутаётган одамлар орасида бошланган тартибсизлик вақтида яна 93 киши ҳалок бўлди. Урушдан чарчаган аҳоли ҳар қандай ёрдам учун курашмоқда, лекин тартибни сақлашга масъул аскарлар бунга тайёр эмас.

Икки йиллик можаро натижасида Ғазо тартибсизлик ва оммавий очарчиликка юз тутди. Исроил Гуманитар ёрдам жамғармаси (GHF) орқали озиқ-овқат етказишни йўлга қўйди, бироқ тақсимот марказлари кичик, соатлари чекланган ва хавфсизлик заиф. Бу муаммони ҳарбий куч билан ҳал қилишга уриниш эса талафотларга олиб келмоқда.

Халқаро Қизил Хоч қўмитаси Рафоҳдаги шифохонада 3 мингдан ортиқ ярадорни қабул қилди, 250 дан ортиқ ўлим қайд этилди. Ирландиялик физиотерапевт Рике Хейз бу ердаги ҳолатни “ҳар куни такрорланадиган даҳшат” деб таърифлади.

Исроил мудофаа вазири Ёав Галлант Ғазода урушдан кейинги бошқарув режасини таклиф қилганди, лекин Бош вазир Нетаньяҳу томонидан бу режа рад этилиб, Галлант истеъфога чиқарилган. Хавфсизлик хизмати раҳбари Ронен Бар ҳам муқобил бошқарув вариантларини илгари сурган, бироқ у ҳам лавозимидан озод қилинган.

– Исроил Мудофаа Кучлари (IDF) жанговар армия, лекин у тинч аҳолига ёрдам кўрсатиш ёки тартибни сақлашга мослашмаган, - дея тан олади Исроил аскарларидан бири. – Танк ёки қурол-аслаҳа билан оч қолган одамларни қўрқитиш инсонийликдан эмас.

Хулоса қилиб айтганда, аҳоли ҳам, ҳарбийлар ҳам бу низонинг якунланишини истайди. Тинчлик ва инсонийликка қайтиш –  ягона йўл.

Мусулмон Зиё, ЎзА