Бугунги кунда “Ҳудудгазтаъминот” акциядорлик жамияти “Ҳудудгаз Наманган” газ таъминоти филиали томонидан вилоят бўйлаб табиий газ тизимида кенг кўламли ишлар амалга оширилмоқда.

Хусусан, Наманган шаҳри ҳамда Янги Наманган туманида 2025-2026 йиллар куз-қиш мавсумига тайёргарлик кўриш мақсадида Оби ҳаёт, Меҳрибонлик, Равнақ ва Нурафшон маҳаллаларига тортилган газ тармоқлари тартибга солинди. Эскирган газ қурилмалари демонтаж қилиниб, ўрнига “РДУК-100” русумли ўрта босимли газ тақсимлаш қурилмаси ўрнатилди.

Янги Наманган тумани аҳолисини табиий газ билан таъминловчи Давлатобод тумани Нуробод даҳасида жойлашган “Наманган-1” газ тақсимлаш станциясининг биринчи тармоғида эса эскириб кетган, диаметри 300 мм. бўлган иккита газ тамбалагичи янгисига алмаштирилди. Шунингдек, туманнинг “Мингчинор” маҳалла фуқаролар йиғини ҳудудидаги “РДУК-50” русумли газ тақсимлаш қурилмаси янгисига алмаштирилди. 

Бундай техник модернизация ишлари натижасида табиий газни тежаб, таъминотда юзага келиши мумкин бўлган узилишларнинг олди олинади. 

Оқилхон Дадабоев, ЎзА