AQSHning Garvard universiteti ilmiy izlanuvchisi Aleksandra Dennett Xiva xoni saroyidagi ilk fotosuratchi va o‘zbek kinosi va fotografiyasi asoschisi bo‘lgan Xudoybergan Devonov haqida ilmiy ish olib bormoqda.

Aleksandra Dennettning so‘zlariga ko‘ra, Xudoybergan Devonov ham boshqa jadidlar kabi josuslikda nohaq ayblanib, qatag‘on qurboni bo‘lgan. Amerikalik tadqiqotchi o‘z so‘zida, avvallari qatag‘on qurbonlari haqidagi hujjatlar va ma’lumotlar juda kam bo‘lgani va mustaqillikdan keyin ular haqida ko‘proq bilib olish imkoniyati yaratilganini yuksak baholadi.  

Ma’lumot o‘rnida ta’kidlash lozimki, joriy yil 11-12 dekabr kunlari Toshkentda “Jadidlar: milliy o‘zlik, istiqlol va davlatchilik g‘oyalari” mavzusidagi xalqaro ilmiy konferensiya bo‘lib o‘tgan edi.  

Tadbir doirasida ishtirokchilar jadidchilik harakati g‘oyasi, maqsad va vazifalarini izchil o‘rganishda yangi insaydlar, harakatning ma’rifat va noshirlik sohasidagi hissasi, milliy davlatchilik shakllanishi bo‘yicha ijtimoiy-siyosiy sa’y-harakatlari, shuningdek, jadidlarning ilmiy va madaniy merosi, ularning tadqiqotlari borasida fikr almashdi.  

Ushbu anjumanda qatnashgan Garvard universiteti doktoranti jadidlar haqida eshitish va ularni o‘rganishga bo‘lgan ishtiyoqi yanada ortgan.  

Muhayyo Toshqorayeva, O‘zA