Гандбол бўйича Ўзбекистон U20 қизлар терма жамоаси аъзолари Шимолий Македония пойтахти Скопе шаҳрида ўтказиладиган жаҳон чемпионатида иштирок этиш учун жўнаб кетди.

Бешта қитъанинг 32 та миллий терма жамоалари иштирокида ўтказиладиган мазкур жаҳон чемпионати мусобақалари эртага, 19 июндан бошланади.

Айтиш лозимки, Ўзбекистон қизлар терма жамоаси ушбу жаҳон чемпионатига йўлланмани жорий йилнинг 28 феврал – 3 март кунлари пойтахтимизда ташкил этилган «IHF Trophy» турнирида қўлга киритганди.

Гандболчи қизларимиз жаҳон чемпионатининг «G» гуруҳида Черногория, Португалия, Гвинея терма жамоалари билан жой олган бўлиб, ҳамюртларимиз илк ўйинни 19 июнь куни Черногория терма жамоасига қарши ўтказади.

Терма жамоамиз 21 июнь куни ўтадиган 2-тур баҳсида Португалия терма жамоаси билан куч синашса, 22 июнь куни бўладиган сўнгги 3-турда Гвинея вакиллари билан рўбарў келади.

Жаҳон чемпионати мусобақалари 30 июнга қадар давом этади.

Т. Рўзиев, ЎзА