Осиё гандбол федерацияси (AHF) жорий йил қитъа миқёсида ўтказиладиган бир нечта ёш тоифалари ўртасидаги қитъа чемпионатларининг муддати ва манзилларини эълон қилди.

Эътиборли жиҳати, улардан бири, яъни U-20 ёш тоифасидаги қизлар жамоалари ўртасидаги XVIII Осиё чемпионати жорий йилнинг 20-29 август кунлари пойтахтимизда ташкил этиладиган бўлди.

Айтиш лозим, 2026 йилги XXV жаҳон чемпионатининг 4 та йўлланмаси учун кечадиган Осиё чемпионати баҳсларида 20 дан зиёд мамлакат терма жамоалари ғолиблик учун кураш олиб бориши кутилмоқда.

Осиё гандбол федерацияси (AHF) ижроия қўмитаси қарорига биноан U-17 ўсмирлар жамоалари ўртасидаги I Осиё чемпионати 1-9 июль кунлари Иордания пойтахтида, U-18 қизлар жамоалари ўртасида бўладиган XI Осиё чемпионати 15-24 июль кунлари Хитойнинг Цзинганшан шаҳрида ўтказилиши белгиланди.

Т.Рўзиев, ЎзА