Россиянинг Тольятти шаҳрида ўтказилаётган XXII халқаро болалар гандбол фестивали поёнига етишига уч кун қолганда мамлакатимизнинг иккита жамоаси ўз ёш тоифаларида совриндорлар қаторидан жой олиш имкониятига эга бўлди.

2009-2010 йилларда туғилган ўғил болалар биринчилигида мамлакатимизнинг икки жамоаси — РОПСТТМ (Тошкент) ва Хоразм вилояти вакиллари 1-6 ўринлар учун баҳс олиб борди. Қизиқарли кечган ўйинда пойтахтлик гандболчилар ютуққа эришиб, ҳал қилувчи босқич иштирокчисига айланди. Бу эса ўз-ўзида РОПСТТМ жамоасига медаллар учун курашиш эшикларини очди. 

Тошкентнинг ёш гандболчилари чемпионлик йўлида 6 июнь куни “Медведи” (Тольятти), 7 июнь куни СШ “Лидер-1” (Егорьовск, Москва вилояти) жамоалари билан 1-3-ўринлар масаласига ойдинлик киритади.  

Халқаро болалар гандбол фестивалининг 2012 йилда туғилган ўғил болалар биринчилигида Андижон вилояти жамоаси ғалабали юришини яна давом эттирмоқда.  

Водийлик гандболчилар бундай нуфузли мусобақада биринчи марта қатнашаётганига қарамай мамлакатимиз спорт шарафини муносиб ҳимоя қилмоқда.  

1-6 ўринлар учун кечган беллашувда Андижон жамоаси Санкт-Петербург шаҳрининг “Приморский” жамоасини  22:16 ҳисобида мағлуб этиб, рақибларини томошабинлар сафига кузатиб қўйди.  

Халқаро турнирнинг олтин медалга эга чиқиш йўлида андижонлик ёш гандболчилар 6 июнда СШ “Тушино” (Москва) жамоасини, 7 июнда Москва вилояти жамоасини енгиши талаб этилади.  

Бугун, 5 июнь куни XXII халқаро болалар гандбол фестивали низомига мувофиқ иштирокчилар  учун дам олиш куни этиб белгиланган.  

Эртага, 6 июнь куни ўтадиган баҳсларда 2009-2010 йилларда туғилган ўғил болалар биринчилигида РОПСТТМ (Тошкент) жамоаси “Медведи” (Тольятти) билан рўбарў келса, 2012 йилда туғилган ўғил болалар биринчилигида ғалабага бўлган иродасини намойиш этаётган Андижон вилояти жамоаси СШ “Тушино” (Москва) тўсиғидан ўтишга ҳаракат қилади.  

Т.Рўзиев,

ЎзА