Пойтахтимиздаги “Олимпия шаҳарчаси” спорт мажмуасида гандбол бўйича эркаклар ва аёллар жамоалари ўртасидаги Ўзбекистон чемпионати 1-давра ўйинларининг икки кунлик учрашувлари ортда қолди.

Кеча ўтказилган иккинчи кунги ўйинлар давомида чемпионатнинг тантанали очилиш маросими ташкил этилди.

Очилиш маросимида иштирок этган спорт вазири маслаҳатчиси Шарифжон Мўминжонов, Ўзбекистон гандбол федерацияси раисининг биринчи ўринбосари Жасур Акромов ва бошқа мутасаддилар гандбол бўйича мамлакат чемпионатининг янги мавсуми билан иштирокчиларни қутлаб, маҳоратли спортчиларни аниқлаш ва миллий терма жамоаларга иқтидорли спортчиларни танлашда ҳар бир ўйин катта аҳамият касб этишини таъкидлади.

Бевосита ўйинларга тўхталадиган бўлсак, аёллар ўртасида ташкил этилган биринчи ва иккинчи кунги қарама-қаршиликларда Хоразмнинг “Ranch”, Тошкент вилоятининг “ОКМК” ва Тошкент шаҳри жамоалари рақибларини мағлубиятга учратди.

Эркаклар жамоалари ўртасида ўтган иккинчи кунги баҳсларда Хоразмнинг “Маъмун” жамоаси Қорақалпоғистон Республикаси гандболчи йигитларидан 27:23, Тошкент шаҳри Андижон жамоасини 45:34, Тошкент вилоятининг “ОКМК” жамоаси Самарқанд гандбол усталарини 31:20, Термиз давлат университети йигитлари "Қўқон ДУ" жамоасини 37:23 ҳисобида мағлубиятга учратди.

Бугун, 24 февраль куни Ўзбекистон чемпионати 1-давра ўйинларининг учинчи кунида аёллар жамоалари навбатдаги баҳсларга киришади.

Унда иккита турда ғалаба қозонган “Ranch” гандболчи қизлари пойтахт жамоаси билан куч синашса, “ОКМК” вакиллари ўтган турларда Тошкент жамоасига 28:25 ҳисобида имкониятни бой бериб, иккинчи ўйинда Республика олимпия ва паралимпия спорт турлари маркази жамоасини 20:26 кўринишида доғда қолдирган Наманган жамоаси билан рўбарў келади.

Бугун эркаклар жамоалари учун чемпионат низомига мувофиқ дам олиш куни сифатида белгиланган.

Чемпионат 28 февралга қадар давом этади.

Т.Рўзиев, ЎзА