Шу кунларда Хитойнинг Сучжоу шаҳрида ўн саккиз ёшгача бўлган қизлар жамоалари ўртасида X-жаҳон чемпионати баҳслари ўтказилмоқда.

16 та жамоа асосий босқичнинг тўрт гуруҳида чемпионлик учун кураш олиб бораётган Х-жаҳон чемпионатининг шиддатли беллашувларини бошқаришда иштирок этаётган 22 та давлатнинг 44 нафар ҳаками орасида ўзбекистонлик мутахассисларнинг борлиги эътиборлидир.

Бугунгача ўзбекистонлик халқаро тоифадаги ҳакамлар Ҳасан ва Ҳусан Исмоилов жаҳон чемпионатининг гуруҳ босқичидаги икки учрашувни бошқарди. Ҳамюртларимиз аввалига Нидерландия – Жанубий Корея (24:19), кейин эса Миср – Руминия (29:36) қарама-қаршилигидаги ўйинларда фаолият кўрсатди.

Мазкур жаҳон чемпионатида ўзига хос рекордлар ҳам қайд этилаётганини таъкидламоқ лозим.

2024 йилги жаҳон чемпионатида бир ўйинга мухлисларнинг ташрифи бўйича рекорд янгиланди. Жумладан, Дания – Хитой терма жамоалари учрашувини томоша қилиш учун 5 минг 50 нафар ишқибоз стадионга келгани қайд этилди. Мухлислар ташрифи бўйича олдинги рекорд 2018 йили Польшада ўтказилган жаҳон чемпионатида ўрнатилган бўлиб, ўшанда Польша – Ангола баҳсини 3 минг томошабин стадионда туриб қўллаб-қувватлаганди.

Айтиш лозим, гандбол бўйича U18 жаҳон чемпионатига 2006 йили асос солинган бўлиб, ўтган йиллар давомида Канада (2006), Словения (2008), Доминикан Республикаси (2010), Черногория (2012), Шимолий Македония (2014, 2022), Словакия (2016) ва Польша (2018) давлатлари мезбонлик қилган. 2020 йилги жаҳон чемпионати COVID-19 туфайли ўтказилмаганди.

Чемпионат 25 августга қадар давом этади.

Т. Рўзиев, ЎзА