Xorazm viloyatining Urganch shahridagi «Yoshlik» sport majmuasida gandbol bo‘yicha oliy liga erkaklar va ayollar jamoalari o‘rtasidagi O‘zbekiston chempionatining 4-tur bellashuvlari qizg‘in tarzda yakunlandi. Mazkur musobaqa mamlakatimizning eng kuchli jamoalarini aniqlab berdi.

Erkaklar o‘rtasida Toshkent viloyatining “OKMK” jamoasi mutlaq g‘oliblikni qo‘lga kiritdi. Toshkent shahar terma jamoasi kumush medalga ega chiqdi. Xorazmning “Ma’mun” jamoasi esa munozarali bellashuvlarda munosib o‘yin namoyish etib, bronza medaliga sazovor bo‘ldi.

Ayollar o‘rtasida esa Xorazm viloyatining “RANCH” jamoasi 44 ochko bilan chempion bo‘ldi. Toshkent shahar terma jamoasi 42 ochko bilan kumush medalni qo‘lga kiritdi. Toshkent viloyatining “OKMK” jamoasi esa 40 ochko bilan uchinchi o‘rinni egalladi.  

Urganchda o‘tgan ushbu tur nafaqat natijalar, balki sport muhitini ham yanada kuchaytirdi.  

Gandbol  jamoaviy fikrlash, tezkor qaror qabul qilish va matonat talab qiladigan sport turi. Musobaqada ishtirok etgan har bir jamoa shu xususiyatlarni yana bir bor isbotladi. Ayniqsa, mahalliy jamoalarning fidoyiligi va tashabbuskor o‘yini muxlislarga quvonch ulashdi.

Bunday bellashuvlar sportchilarga yangi maqsadlar,  yangi ruh bag‘ishlaydi.

N. Rahmonova, O‘zA