Ұлыбританиядағы Данди университетінің Анатомия және адамды сәйкестендіру орталығының ғалымдары әлемдік ғылымның дамуына орасан зор үлес қосқан ұлы ортаазиялық энциклопедиялық ғалым Әбу Әли ибн Синаның келбетін қалпына келтірді.

Мұндағы мәліметке қарағанда, Ибн Синаның кескіні оның Хамадандағы қабірін көшіру кезінде түсірілген фотосуреттерден қалпына келтірілгені хабарланды. Оның 50 жастан асқан келбеті жоғарыдағы суреттегідей болған.

Қазір бұл зерттеу Ибн Синаның бет-әлпетін қалпына келтіруге арналған алғашқы ғылыми әрекет деп бағалануда.

Батыста Авиценна атымен танымал болған Әбу Әли ибн Сина - әлемдік ғылым мен философияның дамуына өлшеусіз үлес қосқан ортағасырлық ғалым, дәрігер және философ. Ғалым 980 жылы Бұхара маңындағы Саманидтер мемлекеті - Афшана елді мекенінде дүниеге келген.