Сурхондарё вилоятида ғалла ўрим-йиғими қизғин олиб борилмоқда. Мавсумни сифатли якунлаш учун вилоятда 286 та комбайн, 1 минг 216 та дон ташиш транспорти жалб этилган.

Воҳада деҳқонларнинг бетиним меҳнати эвазига етиштирилган мўл ҳосилни беталафот йиғиштириб олиш учун “Долзарб 40 кун” профилактик тадбири доирасида ғаллазорлар ва дон қабул қилиш шохобчаларини ёнғиндан асраш, ёнғин хавфсизлигининг олдини олиш ва ёнғин оқибатларига бағишланган тарғибот-тушунтириш ишлари олиб борилмоқда.

Ангор тумани ғаллакорлари бу йил 6 минг гектар майдонда бошоқли дон парваришлади. Шу кунларда ўрим-йиғимни уюшқоқлик билан беталафот якунлаш учун ёнғин хавфсизлигига қаратилган профилактик тадбирлар ташкил этилмоқда.

– Юртимизда 20 майдан 20 июнга қадар “Долзарб 40 кун” профилактик тадбири ўтказилмоқда, – дейди туман фавқулодда вазиятлар бўлими профилактика ва назорат бўлинмаси инспектори, катта лейтенант Нурбек Донаев. – “Ғалла-2025” мавсумини беталафот ўтказиш учун ёнғинларнинг олдини олиш мақсадида туман фавқулодда вазиятлар бўлими ходимлари бириктирилган. Шунга мувофиқ жойларда ёнғин хавфсизлигини таъминлаш бўйича профилактик тушунтириш ва йўриқномалар бериб келинмоқда. 

Туманда ҳосилни исроф қилмай йиғиштириб олиш, қабул шохобчаларига етказиш учун 26 та юқори унумли комбайн ва 80 дан ортиқ ташиш техникасидан фойдаланилмоқда. Ҳозиргача туманда 3 минг 250 гектардан ортиқ майдондаги бошоқли дон йиғиб олиниб, омборларга қарийб 24 минг тонна сара дон тўкилди. Доннинг бир қисми фермер хўжаликларининг фидойи сувчи ва ишчиларига, кам таъминланган, эҳтиёжманд оилаларга бепул тарқатиляпти. Ғалладан бўшаган майдонлар пешма-пеш шудгорланиб, иккинчи экин экишга тайёрланмоқда.

Ўрим-йиғим давом давом этмоқда.

<iframe width="640" height="420" src="https://www.youtube.com/embed/dB8L0cpJk0U" title="G‘allazorda “Dolzarb 40 kun” profilaktik tadbiri qanday o‘tmoqda?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Холмўмин Маматрайимов, ЎзА мухбири