«Ғаламдық инновация индексі – 2025» тұсаукесері өтті. Бұл индекс – елдердің инновациялық даму деңгейі мен бәсекеге қабілеттілігін бағалайтын жыл сайынғы халықаралық рейтинг.

Өзбекстан Әділет министрі Акбар Тошқулов таныстырылымдағы сөзінде мемлекет тарапынан инновациялық даму мәселесіне жоғары деңгейде көңіл бөлініп келе жатқанын атап өтті. Оның айтуынша, Өзбекстан соңғы тоғыз жыл ішінде (2015–2024 жылдар аралығында) бұл рейтингте 40 сатыға көтерілген.

Интеллектуалдық меншік саласындағы жобалар мен үздіксіз реформалар, стартаптарды қолдау және цифрлық қызметтерді енгізу – елдің инновациялық дамуының негізгі факторлары ретінде көрсетілді.

Сондай-ақ Өзбекстанның алдағы уақытта білім мен инновацияға негізделген экономика құруға, жастарды қолдауға және халықаралық әріптестікті кеңейтуге ұмтылысы сөз болды.

«Ғаламдық инновация индексі – 2025» нәтижесіне сәйкес, Өзбекстан 2024 жылмен салыстырғанда 4 саты жоғарылап, 79-орынға көтерілді және Орталық Азия мемлекеттері арасында бірінші орынға шықты.