Якунланган ҳафтада бутун дунё эътибор марказида бўлган яна бир йирик саммит бўлиб ўтди. 22-23 ноябрь кунлари Жанубий Африканинг Йоханнесбург шаҳрида G20 давлатлари етакчилари саммитида иқлимни молиялаштириш, қарзларни енгиллаштириш механизмларини кучайтириш ва маҳаллий иқтисодиётларда муҳим минераллар қийматини сақлаб қолиш каби масалалар кўриб чиқилди.

Мазкур саммитнинг энг муҳим воқеаларидан бири – Қўшма Штатлар раҳбари Дональд Трамп анжуманда иштирок этмади ва АҚШ делегациясининг эътирозларига қарамай, етакчилар томонидан Йоханнесбург декларацияси қабул қилинди.

– Мазкур саммит декларацияси шунчаки сўз эмас, бу бутун дунё бўйлаб одамлар ҳаётини яхшилайдиган аниқ ҳаракатларга содиқликдир, -деди Жанубий Африка президенти Сирил Рамафоса.

Якуний декларация глобал можароларга барҳам бериш, иқлимни молиялаштиришни кўпайтириш ва Африканинг ривожланиш устуворликларини глобал кун тартибининг марказига қўйиш зарурлигини таъкидлайди.

Шунингдек, декларация Фаластиннинг бошқа можаролар билан бир хил контекстда биринчи марта тилга олинишини билдиради ва Париж келишуви мақсадлари ҳамда ривожланаётган мамлакатлар учун иқлим ўзгаришига триллионлаб маблағ ажратилиши зарурлигини яна бир бор тасдиқлайди.

G20 етакчилари саммитида раисликни АҚШга топшириш анъанавий маросими бўлиб ўтмади. 

Гўзал Сатторова, 

ЎзА