Ёҳуд Ўзбекистон термаси Венесуэла билан куч синашади

Хабарингиз бор, 12 сентябрдан 3 октябрга қадар Литва давлатининг уч шаҳрида - Вилнюс, Каунас ҳамда Клайпедада футзал бўйича жаҳон чемпионати бўлиб ўтади.

Мундиалнинг сўнгги иштирокчилари – Осиёдан иккита йўлланма эгалари ҳам аниқланди. Қитъамиздан Осиё плей офф ўйинларида Ироқ - Таиланд ва Ветнам - Ливан жамоалари ўзаро кураш олиб боришди. Уй-меҳмон тарзида бўлиб ўтган баҳслар натижасига кўра, Таиланд билан Вьетнам ўз мақсадларига етишди. Таиландликлар ироқликларни сафарда 7:2, ўз майдонида эса 4:0, вьетнамликлар эса ливанликлар билан икки бор дуранг ўйнади – сафарда 0:0, ўз уйида 1:1. Фақат сафарда урилган гол вьетнамликларга жаҳон чемпионати йўлланмасини ҳадя этди. Осиёдан Эрон, Япония ва Ўзбекистон терма жамоалари аллақачон жаҳон чемпионати қатнашчилари таркибидан жой олиб улгуришган.

Шу тариқа жаҳон чемпионатида кураш олиб борувчи олти қитъанинг 24 та термаси билан танишинг:

ОФК 5та жой: Эрон, Япония, Ўзбекистон, Таиланд, Вьетнам

КОНМEБОЛ. 4та жой: Бразилия, Аргентина (амалдаги чемпион), Парагвай, Венесуэла

ОФК (Океания). 1 та жой: Соломон ороллари

УЕФА. 6та жой: Россия, Португалия, Испания, Қозоғистон, Чехия, Сербия,

Литва (мезбон)

КАФ. 3та жой: Ангола, Миср, Марокаш.

КОНКАКАФ 4 та жой: Коста-Рика, Панама, Гватемала, АҚШ.

Литвада ўтадиган мазкур жаҳон чемпионати тартиб бўйича тўққизинчиси ҳисобланади. 1989 йилда старт олган кичик мундиалнинг сўнгги –саккизинчи мавсуми 2016 йили Колумбияда ташкил этилган. Ва бу галгиси ўзбекистонликларнинг илк иштироки сифатида ҳам ёдимизда қолди. Саккизта чемпионатнинг энг кўп чемпионлиги Бразилия термасига насиб этган – 5 маротаба. Испания термаси икки марта бош соврин соҳиби бўлган, Колумбиядаги жаҳон чемпионатининг олтин медалини эса илк бор Аргентина термаси қўлга киритган. Яна бир қизиқ томони, Колумбияда Бразилия термаси илк бор совринсиз қолган.

Умид қиламизки, Баҳодир Аҳмедов устозлигидаги терма жамоамиз жаҳон чемпионатидаги кетма-кет иккинчи иштирокида мухлисларини хурсанд этишади. Бунга шубҳамиз йўқ. Сабаби, биринчидан, термамиз таркиби бугуннинг энг чаққон, тажрибали, кўзи ёнадиган ёшлардан ташкил топган. Иккинчидан, футболимиз мутасаддилари футзалчиларимиз учун зарур барча шароитларни яратиб бермоқда. Учинчидан эса, терма жамоамиз дунёнинг манаман деган термалари билан ўртоқлик учрашувларида анча тобланди. Шу йилнинг ўзида Баҳодир Аҳмедов шогирдлари Осиё чемпиони, жаҳон чемпионати бронза медали совриндори Эрон, Африка чемпиони Марокаш, жаҳон чемпиони Аргентинага қарши иккитадан ўртоқлик ўйинларида майдонга тушди.

Навбатдаги рақиб ҳам анойилардан эмас, пойтахтимизга жаҳон чемпионати иштирокчиси ва Жанубий Aмериканинг энг кучли терма жамоаларидан бири Венесуела ташриф буюради. ЎФA билан келишувга кўра Венесуэла терма жамоаси Тошкентдаги йиғинлари доирасида 25-28 июнь кунлари Ўзбекистон терма жамоаси билан иккита ўртоқлик учрашуви ўтказади. Ўйинлар «Юнусобод» спорт мажмуасида бўлиб ўтиши режалаштирилган.

Ойбек ЮНУСОВ, ЎзА