Пойтахтимиздаги “Юнусобод” спорт мажмуасида футзал бўйича Олий лига баҳслари давом этмоқда. Мусобақанинг ортда қолган 1-тур иккинчи кунги ўйинларидан сўнг “Локомотив” жамоаси 6 очко билан пешқадамга айланиб олган вазиятда “Насаф”, “Қизилқум”, “Динамо”, “Нефтчи”, “Сурхон” ва SQB футзалчилари энди курашга қўшилишга ҳозирланмоқда.

Кеча ўтказилган 1-турнинг иккинчи кунида “Максам-Чирчиқ” - BMB (Жиззах) жамоалари рўбарў келди. Қизиқарли кечган баҳсда Ўзбекистон суперкубоги соҳиби BMB футзалчилари чирчиқликларни 6:3 ҳисобида мағлуб этди. Учрашувда “Максам-Чирчиқ” дарвозасига 2 та тўп киритган Музаффар Аҳаджонов энг яхши, деб топилди.

Тошкентнинг иккита гигант жамоалари - “Бунёдкор” ва “Локомотив” тўқнашувида темирйўлчилар зафар қучди. 4:1 ҳисобида “Локомотив” фойдасига якунланган баҳсда голларга Шоҳрух Шокаримов, Исломбек Бойтураев, Илёс Маллаев, Сарвар Шоаҳмедов, Мирзоҳид Ҳайдархўжаев муаллифлик қилди. Илёс Маллаев учрашувнинг энг яхши футзалчиси сифатида эътироф этилди. Биринчи турнинг иккинчи кунида “Бунёдкор”ни, биринчи кунги курашда “Максам-Чирчиқ”ни 7:2 ҳисобида енгган темирйўлчилар турнир жадвали пешқадами бўлиб турипти.

Иккинчи кунги баҳснинг марказий ўйини - ОКМК (Олмалиқ) - “Oil Star” (Бухоро) “дуэли”да мухлислар кутганидек бухороликларнинг устунлиги рўй бермади. Суперкубок финалчиси бўлган “Oil Star” шиддатли учрашувда олмалиқликларга 4:5 кўринишида имкониятни бой бериб қўйди.

Бугун, 4 сентябрь куни Олий лига 1-тур учинчи кунги баҳсларида SQB (Тошкент) - “Сурхон” (Термиз), “Насаф” (Қарши) - “Қизилқум” (Навоий), “Динамо” (Самарқанд) - “Нефтчи” (Фарғона) учрашувлари бўлиб ўтади.

Олий лига ўйинлари 7 сентябрга қадар давом этади.

Т.Рўзиев,

ЎзА