Пойтахтимиздаги “Юнусобод” спорт мажмуасида футзал бўйича давом этаётган Олий лига мусобақаси 1-турининг тўртинчи кунида “Бунёдкор” жамоасини 9:3 ҳисобида мағлуб этган Жиззахнинг BMB жамоаси турнир жадвалининг энг юқорисига кўтарилиб олди.

Ортда қолган кечаги ўйинларда Бухоронинг “Oil Star” футзалчилари Тошкентнинг “Локомотив” жамоасини 6:4 кўринишида енгган бўлса, Олмалиқнинг ОКМК жамоаси “Максам-Чирчиқ”ни 4:2 ҳисобида доғда қолдирди.

Бугун, 6 сентябрь куни 1-турнинг бешинчи кунги ўйинларида “Насаф” “Сурхон” билан, “Динамо” “Қизилқум” билан, SQB “Нефтчи” билан рўбарў келади.

Турнир жадвалида 7 очко билан BMB жамоаси етакчилик қилаётган бўлса, кейинги ўринларни банд этган “Локомотив” ва ОКМК футзалчиларида 6 очко мавжуд.

Эслатиб ўтамиз, Олий лига мусобақаси 1-турининг сўнгги ўйинлари эртага, 7 сентябрь куни бўлиб ўтади.

Т.Рўзиев,

ЎзА