Бугундан футзал жамоатчилигининг диққат эътибори Индонезия пойтахти Жакарта шаҳрига қаратилади. Шу йилнинг 27 январь санасидан 7 февралга қадар бўлиб ўтадиган Осиё кубоги баҳслари футзал ишқибозларига унутилмас лаҳзаларни тортиқ этиши шубҳасиз.

Дунёнинг энг йирик Малай архипелагида жойлашган, 17,5 мингдан ортиқ орол ҳамда Янги Гвинея оролининг ғарбий қисмини ўз ичига олган ушбу мамлакат ҳудуди 1 миллион 904,6 минг квадрат километрни ташкил этади.  

Сўлим табиатга эга Индонезия мамлакати футзал бўйича Осиё кубоги баҳсларига иккинчи бор мезбонлик қиляпти. Бундан аввал 2002 йилда қитъа чемпионати айнан шу мамлакатда ўтказилган эди. Орадан 24 йил ўтиб, Осиё футзалчилари яна Индонезияда жам бўлади.

2026 йилги Осиё кубоги учрашувларини қабул қилиш учун Жакарта шаҳридаги икки йирик спорт иншооти — Индонезия Арена ва Жакарта Халқаро Володроми тайёр ҳолатга келтирилган.  

Пойтахт марказида қад ростлаган Индонезия Арена 2023 йил 7 август куни расман фойдаланишга топширилган бўлиб, 16 500 томошабинга мўлжалланган замонавий ва универсал спорт мажмуаси ҳисобланади.

Жакарта Халқаро Володроми эса пойтахтнинг шарқий қисмида, Равамангун ҳудудида жойлашган. Мазкур иншоот 2018 йилги Осиё ўйинлари доирасида барпо этилган бўлиб, 8 500 томошабинни қабул қилиш имкониятига эга.

Мусобақа тақвимига кўра, Осиё кубоги–2026 нинг “А” ва “C” гуруҳлари учрашувлари Индонезия Аренада, “Б” ва “Д” гуруҳлари баҳслари эса Жакарта Халқаро Володромида ўтказилади. Шу тариқа, Ўзбекистон терма жамоасининг гуруҳ босқичидаги барча учрашувлари пойтахт марказидаги Индонезия Аренада бўлиб ўтади. Гуруҳ босқичининг бир пайтда бошланадиган 3-тур учрашувларида ҳам Ўзбекистон терма жамоаси Индонезия Аренада майдонга тушади. Гуруҳдаги иккинчи учрашув эса Жакарта Халқаро Володромида ташкил этилади.  

Дарвоқе, ҳамюртларимиз ушбу турнирдаги юришини эртага Тожикистонга қарши баҳс билан бошлайди. “You Tube” каналимизга жойланган видеода ушбу турнир ҳақида бир қатор қизиқарли маълумотлар берганмиз. Томоша қилинг.

<iframe width="650" height="420" src="https://www.youtube.com/embed/cXHsZw4u6mg" title="Bugundan futzal jamoatchiligining diqqat e’tibori Indoneziya poytaxti Jakarta shahriga qaratiladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Карим Худойқулов, Анвархўжа Аҳмедов, ЎзА