19 январдан 6 февралга қадар Нидерландияда футзал бўйича Европа чемпионати бўлиб ўтди.

Аслида шу пайтгача Европа чемпионатида иштирокчиларнинг сони турлича бўлиб келган. Илк бор Испанияда ташкил этилган (1996 йил) турнирда 6 та жамоа икки гуруҳга бўлинган ҳолда кураш олиб борган. 1999-2010 йилга қадар ўтказилган тўртта мусобақада жамоалар сони саккизтани ташкил этган. 2010 ва 2022 йиллар оралиғидаги бешта чемпионатда 12 та жамоа ғолиблик учун курашиб келганди. 2020 йилги турнир Kovid-19 боис ўтказилмади. Бу йилдан эса жамоалар сони 16тага етказилди.

12-марта ташкил этилган турнирда фақатгина Италия, Испания ва Россия барча чемпионатларнинг иштирокчиси ҳисобланади. Украина ўнтасида, Португалия тўққизтасида, Сербия эса олтитасида қатнашган. Нидерландия, Хорватия, Озарбайжон термалари беш маротабадан иштирокчи бўлган. Финляндия, Словакия, Словения, Грузия, Босния ва Герцеговина илк бор финал босқичида тўп сурди.

Бу галги мусобақага қадар энг кўп чемпионлик испанияликларга насиб этган – 7 марта. Италия термаси икки бор шоҳсупадан жой олган. Россия ва Португалияга эса бир маротабадан омад кулиб боққан. Амалдаги чемпион Португалия бу гал ҳам бош совринни ўз уйига олиб кетди. Энг кўп кумуш медалга россияликлар сазовор бўлишган – 6 марта. Бу галгиси билан 7 та кумуш медаль бўлди. Энг кўп бронза медал ҳам айнан россияликларга тегишли – 3 марта.

Нидерландия мезбонлик қилган бу галги қитъа чемпионатида жамоалар тўрттадан тўрт гуруҳга бўлинган ҳолда баҳслашишди. Булар,

“А” гуруҳи: Нидерландия, Сербия, Украина, Португалия

“В” гуруҳи: Қозоғистон, Италия, Словения, Финляндия

“С” гуруҳи: Россия, Польша, Словакия, Хорватия

“D” гуруҳи: Грузия, Испания, Озарбайжон, Босния ва Герцеговина.

“А”дан Португалия (9 очко) ва Украина (3 очко), “В”дан Қозоғистон (7 очко) ва Финляндия (4 очко), “С”дан

Россия (9 очко) ва Словакия (4 очко), “D” гуруҳидан эса

Испания (7 очко) ва Грузия (6 очко) терма жамоалари чорак финалга йўлланма олишди.

Чорак финал натижалари:

Португалия – Финляндия – 3:2

Қозоғистон – Украина – 3:5

Россия – Грузия – 3:1

Испания – Словакия – 5:1

Ярим финал.

Португалия – Испания – 3:2

Украина – Россия – 2:3

3-ўрин учун: Испания – Украина – 4:1

Финал. Португалия – Россия – 4:2.

Португалияликлар ҳал қилувчи паллада икки бор чинакам қаҳрамонлик кўрсатишди. Аввалига ярим финалда испанияликларга қарши ўйинда 0:2 ҳисобида ортда бориб, якунда финал йўлланмасини ҳал қилганди. Финалда ҳам ҳудди шу сценария такрорланди – аввалига россияликлардан иккита гол ўтказиб юборишди, учрашувнинг сўнгги сонияларида эса Россия термасининг бўм-бўш дарвозасига ўзларининг тўртинчи голларини киритишди ва кетма-кет иккинчи маротаба Европанинг тенгсиз жамоасига айланишди.

Ойбек ЮНУСОВ, ЎзА