Өзбекстан ұлттық құрамасы Азия аймағындағы 2026 жылғы Әлем чемпионатының үшінші іріктеу кезеңінің 7-турында Қырғызстан құрамасымен кездеседі.

«А» тобындағы бұл матч 20 наурыз күні Ташкенттегі «Бунёдкор» стадионында өтеді. Ойын Ташкент уақытымен 21:00-де басталады.

Кездесуді жапондық төрешілер тобы қадағалайды. Бас төреші қызметін Араки Юсуке атқарады, оған Михара Жун және Ватанабэ Кота қанаттан көмек көрсетеді.

6-турдан кейін Өзбекстан құрамасы 13 ұпай жинап, өз тобында екінші орында келеді. 16 ұпаймен Иран көш бастап тұр, ал БАӘ 10 ұпаймен үшінші, Қатар 7 ұпаймен төртінші орында. Қырғызстан (3 ұпай) және КХДР (2 ұпай) соңғы орындарда.

Айта кетейік, 2026 жылғы Әлем чемпионаты 11 маусым мен 19 шілде аралығында АҚШ, Канада және Мексика елдерінде өтеді. Бұл турнирде 48 команда бақ сынайды. Азияға 8 тікелей жолдама, сондай-ақ құрлықаралық плей-офф арқылы 1 қосымша орын қарастырылған.