Туркиянинг "Фенербахче" клуби Саудия Арабистонининг "Ал-Иттиҳод" жамоаси марказий ярим ҳимоячиси Н'Голо Канте билан шартнома имзолаганини расман маълум қилди. Футболчи ва турк клуби ўртасидаги шартнома 2028 йил июнига қадар мўлжалланган.
Суперлиганинг янги мавсумига тайёргарликни Туркиянинг Анталия шаҳрида олиб бораётган «Қизилқум» жамоаси йиғин доирасида Қозоғистоннинг «Алтай» клубига қарши ўртоқлик учрашувида майдонга тушди. Беллашув навоийликларнинг 2:0 ҳисобидаги ғалабаси билан якунланди. Голларга Самандар Шукуруллаев ва Шаҳзод Раҳматуллаев муаллифлик қилди.
***
Ўзбекистон миллий терма жамоаси ҳужумчиси Элдор Шомуродов фаолиятини Туркия Суперлигасида давом эттириши мумкин. Fotomaç нашрининг хабар беришича, «Башакшехир» клуби футболчи трансфери бўйича «Фенербахче» билан музокаралар олиб бормоқда.
***
Италиянинг «Интер» клуби мухлислари жамоанинг навбатдаги учта сафар учрашувига ташриф буюра олмайди. «La Gazzetta dello Sport» нашрига кўра, мазкур қарор «Кремонезе»га қарши ўйинда содир бўлган интизомий қоидабузарлик сабаб қабул қилинган.
***
Испания кубоги чорак финали доирасида «Барселона» меҳмонда «Альбасете» жамоасини 2:1 ҳисобида мағлуб этиб, ярим финал йўлланмасини қўлга киритди.
***
Англия Лига кубоги ярим финал жавоб учрашувида «Арсенал» ўз майдонида «Челси»ни 1:0 ҳисобида мағлуб этди. Учрашувдаги ягона гол 90+7-дақиқада Каи Хавертц томонидан киритилди.
***
«The Athletic» нашри 2026 йил бошида Англия Премьер-лигасида амалга оширилган трансферлар асосида энг самарали ўнта битим рўйхатини эълон қилди. Ушбу рўйхатдан Марк Гехи, Дуглас Луис ва Конор Галлахер ўрин олди.
***
ФИФА президенти Жанни Инфантино Россия футболига нисбатан жорий этилган чекловлар самара бермаганини таъкидлади. Унинг фикрича, футбол сиёсий жараёнлардан холи бўлиши лозим.
***
Ўзбекистон миллий терма жамоаси ярим ҳимоячиси Акмал Мозговой «Пахтакор» жамоаси билан шартнома имзолади. Футболчи клуб сафида 2027 йил охиригача тўп суради.
***
“Суперлига–2026” мавсумига якуний тайёргарлик босқичини Бирлашган Араб Амирликларида ўтказадиган «Динамо» жамоаси қатор номдор клубларга қарши ўртоқлик учрашувларида майдонга тушади.
Жумладан, самарқандликлар 9 февраль куни Россиянинг 10 карра чемпиони «Зенит» жамоасига қарши йиғиндаги илк ўйинини ўтказади. Шунингдек, 12 февраль куни Арманистоннинг 13 карра чемпиони «Пюник», 14 февралда Россиянинг 3 карра чемпиони «Локомотив» (Москва), 16 февраль куни Қозоғистоннинг 7 карра чемпиони «Астана» ҳамда 19 февралда «Елимай» клуби «Динамо»нинг навбатдаги рақиблари бўлади.
Йиғин якунлангач, жамоа Ўзбекистонга қайтиб, Самарқандда Суперлиганинг 1-тури доирасида «Навбаҳор»га қарши учрашувга тайёргарлик кўради.
Жавоҳир Тошхўжаев, ЎзА