Сергей Чигодаев бошқарувидаги Ўзбекистон U-16 терма жамоаси жорий йилнинг 12-18 август кунлари Индонезиянинг Жакарта шаҳрида ташкил этиладиган халқаро ўртоқлик мусобақасида иштирок этади.

Ушбу турнирда 2025 йил кузида бўлиб ўтадиган U-17 жаҳон чемпионатига йўл олган Индонезия, Мали ва Тожикистон терма жамоалари қатнашади. Уларга қарши беллашувларда юртимиз шарафини 2009 йилда туғилган футболчилардан иборат U-16 терма жамоамиз ҳимоя қилади.   

Мусобақадаги илк ўйинини футболчиларимиз 12 август куни Мали U-17 термасига қарши ўтказади. 15 августда эса мезбон – Индонезия термасига қарши майдонга тушиш кўзда тутилган. Ўзбекистонлик футболчилар 18 август куни Тожикистон U-17 термасига қарши баҳс юритиб, мусобақани якунлайди.  

Маълумот ўрнида қайд этиш жоиз, 2008 йилда туғилган футболчилардан шакллантирилган Ўзбекистон U-17 терма жамоаси сентябрь ойида Испанияда йиғин ўтказиши, шунингдек, Англия, Канада ва Марокаш ёшлар термаларига қарши ўртоқлик учрашувларида иштирок этиши режалаштирилган.  

Жавоҳир Тошхўжаев, ЎзА