Футбол бўйича Ўзбекистон Суперлигасининг 20-тури бугун, 25 сентябрь куни старт олади. Мусобақанинг илк кунги баҳсларида Тошкент ва водий дербиси бўлиб ўтади. Аниқроқ айтадиган бўлсак, бу турда Тошкентдаги “Жар” стадионида “Пахтакор” – “Олимпик”, Андижондаги “Бобур арена“ стадионида “Андижон” – “Нефтчи” клублари ўзаро рақобатлашади.

Шуни таъкидлаб ўтиш лозимки, ўтган турда “Пахтакор” кутилмаганда Олмалиқда “Металлург”га имкониятни бой бериб қўйди ва чемпионлик курашидан деярли чиқиб кетди. Шунингдек, жамоа бош мураббийи Максим Шацких вазифасидан кетгани ҳақида турли хил хабарлар урчиб тургани, “Олимпик” билан учрашувга бош мураббийсиз тайёрлангани жамоани бу турда ҳам қийин аҳволга солиб қўйиши мумкин. Шу боис ҳам бу галги Тошкент дербисида ажойиб ўйин гувоҳи бўламиз.

Дарвоқе, миллий чемпионатларимиз тарихида ҳозирча бу жамоалар беш бор тўқнаш келган. Икки ўйинда “Пахтакор” ғалаба қозонган бўлса, яна бирида рақиб зафар қучган, икки учрашув 1:1 ҳисобидаги дуранг билан якунланган. “Пахтакор“ 8 та гол уриб, ўз дарвозасидан 6 тўпни олиб чиққан.

Шунингдек, “Бобур арена”да ўтиши кутилаётган “Андижон” – “Нефтчи” жамоалари баҳси қизғин ўтиши шубҳасиз. Бунга сабаб, “Андижон” ҳали иккинчи давра баҳсларида ғалабага эриша олмагани, “Нефтчи” турнир жадвалида кучли учликка кириш орзусида “ёнаёт”ганидир. Суперлиганинг биринчи даврасида “Нефтчи” стадионидаги ўйин ҳам шиддатли ўтиб, 2:2 ҳисобида якунланган эди.

Мазкур жамоалар миллий чемпионатларда 50 та учрашув ўтказган бўлиб, уларнинг 33 тасида Фарғона клуби, Андижоннинг бош жамоаси бор йўғи 10 марта ғалаба қозонган. Қолган 7 учрашув дуранг билан якунланган. Тўплар нисбати ҳам “Нефтчи” фойдасига, 97/45.

Статистика бўйича “Нефтчи” анча устун, лекин сўнгги икки йилда “Андижон” бир маромда ўйин ўтказмоқда ва бу клублар ўртасидаги охирги икки ўйин дуранг билан якунланган.

Марказий ўйинларга бой ушбу тур 28 сентябрга қадар давом этади.

Жавоҳир Тошхўжаев, ЎзА