Хабарингиз бор, Ўзбекистон миллий терма жамоаси 11 декабрдан бошлаб Бирлашган Aраб Aмирликларида Осиё кубогига тайёргарлик кўрмоқда.

Шу кунгача жамоамиз бош мураббийи Сречко Катанец Суперлигада тўп сурган ва хориждаги лигаларда мавсумни якунлаган футболчилар билан шуғулланмоқда. ЎФА матбуот хизматининг маълум қилишича, Ўзбекистон миллий терма жамоаси аъзолари Рустам Aшурматов ва Aбдурауф Бўриев йиғинда иштирок этиш учун Бирлашган Aраб Aмирликларига етиб келди. Улар йиғин доирасида ўртоқлик ўйинини ҳам ўтказади. Аниқроғи, 24 декабрь куни вакилларимиз қўшни Қирғиз Республикасига қарши ўртоқлик учрашувида майдонга тушади.    

Сўнгги кунларда Ўзбекистон ва Қирғизистон футбол бўйича ўзаро ҳамкорлик муносабатларини юқори босқичга олиб чиқмоқда. Бунинг натижасида ҳар икки мамлакат ўртасида ўтказилаётган мусобақаларда турли ёш тоифасидаги жамоалар иштирок этмоқда.    

Куни кеча Ўш шаҳрида спортнинг футзал тури бўйича 2009-2010 йилларда туғилган болалар ўртасида халқаро мусобақа ўтказилди. Турнирда Андижон шаҳар Олимпия ва миллий спорт турлари бўйича давлат ихтисослаштирилган мактаб-интернати ва Фарғона вилояти футзал жамоалари иштирок этди. Қизиқарли ва муросасиз ўтган мазкур мусобақада андижонлик ёш футзалчилар чемпионликни қўлга киритди.    

Европа лигаси ва Конференциялар лигасида жамоалар сараланди  

Тунда Европа лигаси ва Конференциялар лигасининг гуруҳ босқичида сўнгги тур учрашувлари ўтказилди ва плей-офф босқичида иштирок этадиган барча жамоалар номи аниқланди.    

Жумладан, гуруҳ босқичида “Вест Хем”, “Фрайбург”, “Брайтон”, “Марсель”, “Рейнжерс”, “Спарта”, “Аталанта”, “Спортинг”, “Ливерпуль”, “Тулуза”, “Вильярреал”, “Ренн”, “Славия”, “Рома”, ”Байер”, “Карабах” каби жамоалар нимчорак финалга йўл олди.    

Маълумот учун, Европа чемпионлар лигасида учинчи ўринни қўлга киритган “Галатасарай”, “Ланс”, “Брага”, “Бенфика”, “Фейеноорд”, “Милан”, “Янг Бойз” ва “Шахтёр” жамоалари Европа лигасида иштирок этади.    

Конференциялар лигасидан эса “Лилл”, “Маккаби Тель-Авив”, “Виктория Плзен”, “Брюгге”, “Астон Вилла”, “Фиорентина”, “ПАОК”, “Фенербахче” плей-офф босқичида иштирок этади. Ушбу босқичга ўтиш ўйинида лиганинг гуруҳ босқичида иккинчи ўринни эгаллаган “Слован”, “Гент”, “Динамо Загреб”, “Буде-Глимт”, “Легия”, “Ференсварош”, “Айнтрахт” ва “Лудогорец” клублари Европа лигасининг учинчи ўрин билан гуруҳ босқичини якунлаган “Олимпиакос”, “Аякс”, “Бетис”, “Штурм”, “Юнион”, “Маккаби Хайфа”, “Серветт” ҳамда “Молде” жамоалари билан ўзаро рақобатлашади.    

ФИФА энг зўрларни аниқлашни бошлади  

ФИФА йилнинг энг яхши футболчиси номинация бўйича якуний 3 та номзодни эълон қилди. Улар – Килиан Мбаппе, Лионель Месси ва Эрлинг Ҳолланд.    

Ушбу футболчиларни танлаб олишгани бежиз эмас, албатта. Мисол учун, Килиан Мбаппе “ПСЖ” билан Лига 1 чемпиони ва Франция билан жаҳон чемпионатида финалгача етиб борди. Лионель Месси эса жаҳон чемпиони ва Лига 1 ғолибига айланди. Шу билан бирга, олтин тўп эгасига айланди. Эрлинг Ҳолланд “Манчестер Сити” билан треблни қўлга киритди. Шунингдек, “UEFA” бўйича йилнинг энг яхши футболчиси деб топилди.    

ФИФА томонидан бериладиган “The Best” соврини ўз соҳибига 9-январь куни топширилади.

Жавоҳир Тошхўжаев,  

ЎзА