Xabar berganimizdek, O‘zbekiston terma jamoasi sardori Eldor Shomurodov keyingi faoliyatini Italiyaning “Kalyari” jamoasida davom ettirmoqda.

Kuni kecha “Kalyari” futbol klubi sayti futbolchilarning 2023/2024 yilgi futbol mavsumida qaysi raqam ostida harakatlanishi bo‘yicha ma’lumotlarni e’lon qildi.  

Unga ko‘ra, hamyurtimiz Eldor Shomurodov “Kalyari” jamoasi tarkibida 61-raqamda harakatlanadigan bo‘ldi.  

“Kalyari” jamoasi bosh murabbiyi Klaudio Raneri yaqinda o‘tkazilgan matbuot anjumanida jamoasining mavsumga tayyorgarligi xususida so‘z yuritib, hamyurtimiz Eldor Shomurodov haqida ham o‘z fikrlarini bildirib o‘tdi:  

– Ishqibozlarning qo‘llab-quvvatlashi asosida munosib o‘yin ko‘rsatishimizga ishonaman. Jamoa jismoniy va ruhiy quvvat bilan harakat qilishi uchun barcha imkoniyatlarimiz yetarli. Jamoaning har bir a’zosi bu yo‘lda o‘z iqtidorini namoyish etadi, albatta. Shomurodov harakatchan yigit. Yaqinda biz uning yuz foizlik imkoniyatlarini maydonda ko‘ramiz, – deya ta’kidlagan murabbiy.    

T. Ro‘ziyev, O‘zA