ФИФА томонидан эълон қилинган сўнгги статистик маълумотларга кўра, Қатарда ўтган 2022 йилги Жаҳон чемпионати кўп масалаларда янги рекордларни ўрнатди. Қайд этилишича, жаҳон чемпионатида 5 миллиардга яқин киши турли платформаларда иштирок этди.

Жаҳон чемпионатидаги ўйинлар ва унинг теграсидаги воқеалар хусусида ижтимоий тармоқларда 93,6 миллионта пост жойлаштирилган. 262 миллиард умумий қамров ва 5,95 миллиард ўзаро таъсирлар мавжудлиги маълум қилинди.  

Жаҳон чемпионатини бевосита стадионларда томоша қилиш 2018 йилдаги мундиалга нисбатан 0,4 миллион томошабинга ортган, яъни 3 миллиондан 2022 йилда 3,4 миллионга кўпайган.  

Қатардаги мундиал ўтган жаҳон чемпионатларига нисбатан дарвозаларга киритилган голлар бўйича ҳам янги рекордни қайд этди. 172 бор дарвозалар ишғол этилган бўлса, 1998 ва 2014 йиллардаги чемпионатларда 171 марта тўп дарвоза тўридан жой олган. 

ФИФА маълумотига кўра, жаҳон чемпионатида 150 та мамлакатдан 20 минг нафар кўнгилли иштирок этган, улардан 17 минг нафари Қатар аҳолиси.  

Қатарда ўтган жаҳон кубоги меросини асраш қўмитаси бош котиби Ҳасан Ал-Тавадий жаҳон чемпионати лойиҳаларини амалга ошириш жараёнида 400 дан 500 нафаргача инсонлар ҳалок бўлганини тан олди, дейилади хабарда.  

Т.Рўзиев, ЎзА