Бугун, 15 март куни Тошкентдаги "Бунёдкор" стадионида Ўзбекистон терма жамоаси U-20 Осиё кубоги финал йўлланмаси учун Жанубий Корея термасига қарши майдонга тушди.

Терма жамоа бош мураббийи Равшан Ҳайдаровнинг техник-тактик схемаси асосида ҳаракатланган футболчиларимиз биринчи ва иккинчи бўлимда муносиб ўйин кўрсатди.  

33 минг 977 нафар ишқибоз гувоҳлигида ўтган ўйин сўнгги дақиқагача давом этди. Финалчи пенальтилар сериясида аниқланди.

[gallery-11004]

Ирода ва матонат намойиш этган футболчиларимиз бу борада омадли эканлигини исботлади.  

Терма жамоамиз дарвозабони Отабек Боймуродов кореялик футболчилар билан 11 метрлик қарама-қаршиликда ўз маҳоратини намойиш этиб, қаҳрамонга айланди ва ҳамюртларимизни финалда яна ироқликлар билан рўбарў келишини таъминлади.

Дарвоқе, ярим финалнинг иккинчи жуфтлигида Ироқ-Япония “дуэли”да ироқликлар финалда курашишга ҳақли эканликларини намойиш этди.

Энди 18 март куни “Бунёдкор” стадионида ўтадиган қитъа кубоги финалида Ўзбекистон-Ироқ чемпионлик учун майдонга тушади.

Т.Рўзиев, ЎзА