Футбол бўйича Европа чемпионлар лигасининг чорак финал босқичидан ўрин олган илк учрашувлар ўтказилди.

Унда «Атлетико» ўз майдонида «Боруссия Дортмунд»дан 2:1 ҳисобида устун келди. Мазкур учрашувда Де Паул ва Линонинг голларига Аллер бир маротаба жавоб қайтарди.

Бир қатор натижаларни янгилаган «ПСЖ» – «Барселона» баҳси 2:3 ҳисобида якунланди. Дастлаб, учрашувнинг биринчи бўлими 37 дақиқасида Рафинья ҳисобни очган бўлса, 48-дақиқада Дембеле мувозанатни тиклади. Орадан икки дақиқа ўтиб, Витор Феррейра Париж клубини олдинга олиб чиқди. Бироқ иккинчи бўлимда бор эътиборини ҳужумга қаратган «Барселона» футболчилари ўйин тизгинини қўлга олди ва 62-дақиқада Рафинья ҳисобни тенглаштирди. Шунингдек, 77-дақиқада Кристенсен томонидан киритилган гол ўйинга нуқта қўйди.

Энди мазкур ўйинда янгиланган натижалар ҳақида қисқача тўхталиб ўтсак. «Барселона» 2019 йилдан кейин илк бора чорак финалда ғалаба қозонди. Ўшанда каталонияликлар «Манчестер Юнайтед»ни иккала ўйинда ҳам енгган эди. Ниҳоят, бу йил кетма-кет 4 мавсумдан кейин Хави шогирдлари қора анъанага чек қўйди.

Шунингдек, «Барселона»нинг метин ҳимоячиси Пау Кубарси Чемпионлар лигаси чорак финалида бошланғич таркибда майдонга тушган энг ёш футболчи сифатида тарихдан жой олди. У 17 ёш, 79 кунлигида мазкур натижани қайд этди. Бундан олдинги рекорд ҳам «Барселона»га тегишли бўлган. Аниқроғи, Боян Кркич 2008 йилда 17 ёш, 217 кунлигида ЕЧЛ мусобақасида ўйинга тушган.

Чемпионлар лигасининг чорак финалининг дастлабки ўйинларида «Реал» – «Манчестер Сити» 3:3 ҳисобида, «Арсенал» – «Бавария» 2:2 ҳисобидаги натижалар қайд этилган эди.

Юқоридаги тўрт ўйиндаги жами голлар 18 тани ташкил этди ва Чемпионлар лигасининг чорак финал доирасидаги биринчи ўйинларнинг энг сермаҳсулидан бири бўлди. ЕЧЛ доирасида чорак финалнинг илк ўйинларида 18 та гол фақат 2010/11 йилги мавсумда киритилган.

Маълумот учун, Чемпионлар лигаси чорак финалидаги дастлабки ўйинлар ўз ниҳоясига етди. Жавоб беллашувлари 17 ва 18 апрель кунлари бўлиб ўтади.

Жавоҳир Тошхўжаев, ЎзА