Маълумки, футбол бўйича жаҳон чемпионати ўйинлари жорий йилнинг 20 ноябрь - 18 декабрь кунлари Қатарда бўлиб ўтади.

Мундиал иштирокчиси бўлган 32 та терма жамоалар 13 ноябргача 23-26 нафар футболчидан иборат якуний таркиб аризаларини тақдим этиши лозим.

Бугунгача Аргентина, Нидерландия, Дания, Хорватия, Португалия, Япония, Коста-Рика, Австралия ва Бразилия каби давлатлар ўз таркибларини тасдиқлаган бўлса, қолганлар айни кунларда кенгайтирилган таркибни эълон қилишга ҳозирланмоқда.

ФИФА маълумотига кўра, бугун, 9 ноябрь куни АҚШ, Уэльс, Швейцария, Франция таркибни тасдиқлайди.

Шунингдек, эртага 10 ноябрь куни Англия, Бельгия, Германия, Польша, 11 ноябрда Испания, Сенегал, 12 ноябрда Жанубий Корея, 13 ноябргача эса Канада, Мексика, Марокко, Гана, Тунис, Эрон, Қатар, Эквадор, Саудия Арабистони, Камерун, Сербия жамоалари Қатар майдонларида тўп сурадиган футболчилар номини эълон қилиши кутилмоқда.

Эслатиб ўтамиз, яна 11 кундан сўнг жаҳон чемпионатига расман старт берилади.

Т.Рўзиев, ЎзА