Бугун, 15 февраль куни Германиянинг Вайсенхаус шаҳрида давом этаётган “Freestyle Chess” бўйича жаҳон чемпионатининг сўнгги кунги баҳсларида барча ўрин соҳиблари маълум бўлади.

Мукофот жамғармаси 300 минг АҚШ долларидан иборат жаҳон чемпионатида иштирок этаётган гроссмейстерларимиздан Нодирбек Абдусатторов бир кун муқаддам ташкил этилган саралашдан кейин иккинчи кунги ўйинларда 1-ўринга даъвогарлик қилган бўлса, Жавоҳир Синдоров 5-8-ўринлар учун кураш олиб борди.

Кеча ўтказилган мусобақанинг 1/2 финалида Абдусатторов норвегиялик Магнус Карлсенга қарши дона сурди.

Дастлабки икки партияда муроса йўли танланди. Учинчи ва тўртинчи партияларда эса ФИДЕ рейтинги етакчиси Магнус ғалаба қозониб, умумий 3:1 ҳисоби билан финалга йўл олди.

Иккинчи 1/2 финалда америкалик Фабиано Каруана германиялик Винсент Кеймерни 2,5:1,5 ҳисобида доғда қолдирди.

Бугун 1-ўрин учун кечадиган ўйинда Магнус Карлсен Фабиано Каруанага қарши баҳс олиб боради. Нодирбек Абдусатторов эса Винсент Кеймер билан 3-4-ўринлар масаласини ҳал этиш учун курашади.

Илк бор ўтказилаётган жаҳон чемпионатида дона сураётган Жавоҳир Синдоров кеча 5-ўрин учун кечган учрашувда ҳиндистонлик Аржун Эригайсига 1:3 ҳисобида йўл берди.

Бугун бу йилги Номзодлар турнирига тайёргарлик кўраётган маҳоратли шахматчимиз Синдоров 7-8-ўринлар кимга насиб этишига ойдинлик киритиш учун америкалик Левон Аронян билан рўбарў келади.

Эслатиб ўтамиз, чемпионатда ғолибликка эришган шахматчи 100 минг АҚШ долларига эга чиқади. 2-ўрин 60, 3-ўрин 40, 4-ўрин 30, 5-ўрин 25, 6-ўрин 20, 7-ўрин 15, 8-поғонадан жой олган иштирокчи 10 минг АҚШ доллари билан тақдирланади.

Т.Рўзиев, ЎзА