Бугун, 14 февраль куни Германиянинг Вайсенхаус шаҳрида дунёнинг энг кучли 8 нафар шахматчиси иштирокида давом этаётган “Freestyle Chess” бўйича жаҳон чемпионатининг ярим финал ўйинлари бўлиб ўтади.

Кеча мукофот жамғармаси 300 минг АҚШ долларидан иборат мусобақанинг дастлабки саралаш баҳслари ҳар жиҳатдан қизиқарли ўтди.

7 та турдан иборат айланма тизимдаги ўйинларда гроссмейстер Магнус Карлсен 4,5 очко жамғариб, етакчиликни қўлга киритган бўлса, ҳамюртимиз Нодирбек Абдусатторов, германиялик Винсент Кеймер ва АҚШ вакили Фабиано Каруана 4 очко жамғариб, кейинги поғоналарни банд этган ҳолда 1-4-ўринлар учун курашни давом эттирадиган бўлди.

Саралаш мусобақаларида кучли тўртликка кира олмаган америкалик Ханс Ниманн, ҳиндистонлик Аржун Эригаиси, ҳамюртимиз Жавоҳир Синдоров ва АҚШ шарафини ҳимоя қилаётган Левон Аронян 5-8-ўринларга даъвогарлик қилади.

Чемпионат дастурига биноан бугун кун давомида ярим финал ўйинлари ўтказилса, 15 февраль куни финал баҳслари ташкил этилади.

Эслатиб ўтамиз, чемпионатда ғолибликка эришган шахматчи 100 минг АҚШ доллари билан тақдирланади. 2-ўрин 60, 3-ўрин 40, 4-ўрин 30, 5-ўрин 25, 6-ўрин 20, 7-ўрин 15, 8-поғонадан жой олган иштирокчи 10 минг АҚШ долларини қўлга киритади.

Т.Рўзиев, ЎзА