Видеоконференцалоқа шаклида ўтказилган мажлисда таъкидланганидек, депутатликка номзодлар рўйхатга олиниши билан сайлов жараёнининг янги, янада муҳим босқичи – сайловолди ташвиқоти бошланди. Бу жараён сайлов қонунчилиги талаблари асосида амалга оширилади.

Марказий сайлов комиссияси Ўзбекистон Республикаси Сайлов кодексининг 14-моддасига мувофиқ барча партиялар томонидан кўрсатилган Ўзбекистон Республикаси Олий Мажлиси Қонунчилик палатаси депутатлигига номзодларни рўйхатга олиш тўғрисида қарор қабул қилди.

Ўзбекистон Республикаси Сайлов кодексининг 42-моддасига мувофиқ сиёсий партия Марказий сайлов комиссиясига партия томонидан кўрсатилган номзодини номзодлар рўйхатидан чиқариш ҳақида мурожаат қилиши мумкин.

Йиғилишда Ўзбекистон Экологик партияси томонидан 79-Жарқўрғон сайлов округидан номзод этиб кўрсатилган С.Холиқовни, Ўзбекистон “Адолат” СДП томонидан 4-Амударё сайлов округидан номзод этиб кўрсатилган З.Зиёдуллаевни Олий Мажлис Қонунчилик палатаси депутатлигига номзодлар рўйхатидан чиқариш тўғрисидаги мурожаатлари кўриб чиқилди.

Шу муносабат билан Олий Мажлис Қонунчилик палатаси депутатлигига 79-Жарқўрғон сайлов округидан номзод этиб кўрсатилган С.Холиқов ва 4-Амударё сайлов округидан номзод этиб кўрсатилган З.Зиёдуллаевлар Қонунчилик палатаси депутатлигига номзодлар рўйхатидан чиқарилди.

Ўзбекистон Республикаси Олий Мажлиси Қонунчилик палатаси депутати А.Кирғизбоев Ўзбекистон Республикаси Вазирлар Маҳкамаси Давлат тилини ривожлантириш департаментининг мудири этиб тайинлангани, шу муносабат билан берган ўз аризасига мувофиқ унинг депутатлик ваколатини муддатидан илгари тугатиш ҳақидаги масала ҳам кўриб чиқилиб, қарор бир овоздан маъқулланди.

Сайловга тайёргарлик кўриш ва уни ўтказиш жараёнларини ёритиш оммавий ахборот воситалари зиммасига катта масъулият юклайди. Кун тартибидан жой олган учинчи масала, айнан маҳаллий ва хорижий ОАВ вакилларини аккредитациядан ўтказишга бағишланди.

Марказий сайлов комиссияси томонидан сайлов кампаниясини ёритиш юзасидан мамлакатимиз ва чет эл журналистларидан яна бир гуруҳи аккредитациядан ўтказилди. Маълумот ўрнида қайд этиш лозим, шу кунга қадар МСК томонидан 225 дан зиёд маҳаллий ҳамда 60 дан зиёд халқаро журналистлар аккредитациядан ўтказилган.

Мажлисда Франция Республикасида очилган сайлов участкалари фаолиятини ташкил этиш юзасидан Ўзбекистоннинг Франциядаги Фавқулодда ва мухтор элчиси Сардор Рустамбоев билан онлайн алоқа ўрнатилди.

Элчининг сўзларига кўра, Сайлов қонунчилиги тарғиботи ойлиги доирасида фуқаролар, меҳнат жамоалари, турли таълим даргоҳлари ҳамда ёшлар ўртасида бир қатор учрашувлар ўтказилмоқда. Сайловчиларнинг овоз бериши учун барча шароитлар яратилмоқда. Бунинг учун сайлов участкаси тузилди. Сайлов кодексига мувофиқ элчихона томонидан мазкур сайловларда иштирок этиш истагини билдирган фуқароларнинг рўйхатини тузиш бошланган.

Франциядаги Ўзбекистон Республикасининг дипломатик ваколатхона ва консуллик муассасаларида 398 фуқаро доимий ёки вақтинчалик рўйхатдан ўтган. Улар асосан Парижда ёки унга яқин бўлган ҳудудларда истиқомат қилишади. Уларнинг сайловда ўзлари хоҳлаган номзодга эркин овоз беришларини таъминлаш бўйича барча шарт-шароитлар яратиб берилмоқда. Париж шаҳрида жойлашган Ўзбекистон Республикаси элчихонасида битта сайлов участкаси ташкил этилган.

Ушбу муҳим сиёсий жараёнга оид маълумотлар билан танишиш истагида бўлган Ўзбекистоннинг Франциядаги фуқаролари эндиликда элчихонанинг расмий веб-сайтига кириб, сайлов қонунчилигидаги янгиликлар, овоз бериш манзили ва куни, вақти ҳамда бошқа кўплаб ахборотларни олишлари мумкин.

Халқаро матбуот маркази Қашқадарё вилояти бўлимининг сайлов жараёнига тайёргарлиги ҳақидаги ахбороти тингланди.

Марказий сайлов комиссиясининг Халқаро матбуот маркази Қашқадарё вилоят бўлими томонидан бугунги кунга қадар ўтказилган 900 дан зиёд тарғибот тадбири маҳаллий ва республика ОАВ орқали кенг ёритилган. Қарши телерадиоканалида 7 та, Қашқадарё вилоят телерадиокомпаниясида 32 та ролик, 18 та кўрсатув, 15 та эшиттириш ва 90 маротаба ахборот дастурларида лавҳалар эфирга узатилган. “Қашқадарё” газетаси, шаҳар ва туман ижтимоий-сиёсий газеталари орқали 145 дан зиёд материал эълон қилинган.