Germaniya Federativ Respublikasining Frankfurt shahrida ikki mamlakat to‘qimachilik, oziq-ovqat hamda qurilish sohalarida faoliyat yurituvchi ishbilarmonlar ishtirokida O‘zbekiston-Germaniya biznes forumi bo‘lib o‘tdi.

Mazkur tadbir O‘zbekiston Savdo-sanoat palatasi, O‘zbekistonning Germaniyadagi elchixonasi hamda “MUSIAD Hessen e.V” uyushmasi bilan hamkorlikda tashkil etildi.

Tadbir davomida mamlakatimizning investitsion salohiyati namoyish etildi. Shuningdek, ikki davlat o‘rtasida olib borilayotgan islohotlar hamda erishilgan kelishuvlar natijalari bo‘yicha muhokamalar o‘tkazildi.

Hozirgi kunda O‘zbekistonda Germaniya sarmoyasi ishtirokida 221 ta korxona faoliyat yuritmoqda.

Forum yakunida O‘zbekiston hamda Germaniya ishbilarmonlari manfaatli savdo shartnomalarini tuzish borasidagi masalalarni atroflicha ishlab chiqdi.

B.Xudoyberdiyev, O‘zA