Франциянинг собиқ президенти Николя Саркози Ливиянинг марҳум раҳбари Муаммар Қаддафийнинг режими билан боғлиқ жиноий иш учун беш йиллик қамоқ жазосига ҳукм қилинди.

Париж суди Саркозини 2007 йилги сайловда ғалаба қозониш учун Қаддафийдан ноқонуний молиявий ёрдам олгани учун айбдор деб топди. Шунингдек, унга 100 минг евро жарима ва 5 йил давомида давлат лавозимларида ишлаш тақиқини қўйди. 

Қизиқ жиҳати, 70 ёшли Саркози мазкур жиноятни содир этганига 20 йил бўлган бўлса-да, энди суд ҳукмига дуч келди. У 13 октябргача прокуратурага бориши керак, шундан сўнг қамоқ муддати ҳисобланишни бошлайди. 

Қонунга кўра, у ҳатто апелляция берса ҳам жазо автоматик равишда ишга тушади. Бироқ Саркозининг ёши ҳисобга олинса, у шартли озодликни сўраш ҳуқуқига эга. Суд жараёнида ундан баъзи айбловлар олиб ташлангани айтилмоқда. Яъни пора олиш, Ливия давлат маблағларини исроф қилиш ва сайлов кампаниясини ноқонуний молиялаштириш каби айбловлардан оқланди, чунки прокурорлар Ливия пуллари Саркозининг сайлов кампаниясига тўғридан-тўғри сарф қилинганини исботлай олмади.

Бош судья Саркози ўз атрофидаги одамларга молиявий ёрдам илинжида Ливия амалдорлари билан боғланишга рухсат берганини қайд этди. 

– Мен ўлкада қонун устуворлигига масъулият билан қарайман, -деди Саркози журналистларга. – Қонунга бўйсунаман, агар улар менинг панжара ортида ўтиришимни истаётган бўлса, бошимни тик тутган ҳолда розиман.

Собиқ президентга ўқилган ҳукмдан кейин мамлакатда кескин баҳслар бошланиб кетди. Депутат Бенжамен Лукас “Саркози яна беш йиллик муддат олди”, деб Франция президентининг ваколат муддатига ишора қилган. Сенатор Стефан Ле Рудулье ҳукмни ноқонуний ва шубҳали деб атаган. 

Мазкур жиноий иш билан боғлиқ 11 нафар киши суд қилинмоқда, улар орасида Саркозининг учта собиқ вазири ҳам бор. Ишнинг асосий фигураларидан бири, Ливия вакили сифатида кўрилган Зиад Такьеддин ҳафта бошида Бейрутда 75 ёшида вафот этди. У 2016 йилда берган баёнотида Қаддафийдан олган 5 млн евро нақд пулни Саркози ва унинг ўша пайтдаги ички ишлар вазири Клод Геанга шахсан етказганини айтган. 

Шунингдек, ишда Қаддафий атрофидаги бир неча муҳим шахслар, жумладан, Александр Жухри ҳам тилга олинган. У ҳам Ливия маблағлари ишида муҳим шахс сифатида кўрилмоқда.

2012 йилда “Mediapart” нашри Қаддафийнинг собиқ разведка раҳбари Мусо Кусса имзолаган ҳужжатни эълон қилган. Ҳужжатда гўёки Саркозининг сайлов кампаниясига 6,5 миллион евро ажратилгани айтилган. Аммо суд бу ҳужжат сохта бўлиши мумкин, дея уни далил сифатида рад этган.

<iframe width="650" height="420" src="https://www.youtube.com/embed/c1wbcW_wmtU" title="Fransiyaning sobiq prezidentiga hukm o‘qildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА