Францияның Aerophile groupe компаниясы Өзбекстанда әуе шары мен аэробар жобаларын жүзеге асыруы мүмкін.

Өзбекстан елшілігінде Францияның Aerophile groupe компаниясының президенті Жером Гиакомонимен кездесу өтті. Кездесу барысында Өзбекстанда туристерге қызмет көрсететін әуе шары мен аэробар жобаларын жүзеге асыру мүмкіндіктері талқыланды. Бұл жобалар Өзбекстанның туризм саласын жаңа деңгейге көтеріп, еліміздің мәдениеті мен табиғи сұлулығын әлемге танытуға мүмкіндік береді.

Компания президенті Өзбекстанда әуе шары мен аэробар жобасын тиімді жүзеге асыру үшін барлық жағдайлардың бар екендігін атап өтті. Әсіресе, Өзбекстанның бай тарихи мұрасы мен табиғи ландшафттары, оның ішінде әлемге әйгілі Қызылқұм, Бухара, Самарқанд, Хива сияқты туризм орталықтары бұл жобаларды сәтті жүзеге асыруға толық мүмкіндік береді.

«Біздің компания Франция, АҚШ, Германия, Испания, Польша, Ұлыбритания, Венгрия, Түркия, БАӘ, Сауд Арабиясы, Оңтүстік Корея, Сингапур, Жапония, Қытай, Тайланд, Камбоджа, Вьетнам, Иордания, Ирак, Тунис, Грузия, Мексика, Бразилия және басқа да туризм индустриясы дамыған елдерде осы жобаны сәтті жүзеге асырды. Аэробар жобасы Өзбекстан үшін қызықты әрі табысты боларына сенімім мол», - деді Жером Гиакомони.

Өзбекстанның туризм индустриясы соңғы жылдары айтарлықтай қарқын алып, халықаралық деңгейде кеңінен танылуда. Елде әлемнің әр түкпірінен туристерді тарту мақсатында ауқымды инфрақұрылымдық жобалар жүзеге асырылып, туризм саласы жаңа деңгейге көтерілуде. Халықаралық стандарттарға сай қызмет көрсету сапасы арттырылып, туристік бағыттар мен аймақтар арасында жаңа мүмкіндіктер ашылып жатыр. Сонымен қатар, республиканың әр өңірінде өткізілетін мәдени және туристік фестивальдер, шаралар елдің беделін әлемге танытып, туристік ағымды қолдайтын маңызды құралға айналуда. Әуе шары мен аэробар жобалары — Өзбекстанның табиғи сұлулығын ерекше тұрғыда танытатын жаңа бастамалар, олар мұнда келетін саяхатшыларға ұмытылмас әсер қалдырып, елдің туристік имиджін нығайтып, туризм саласының одан әрі дамуына айтарлықтай үлес қосады.

Айта кетейік, өткен жылы 3 маусымда Мемлекет басшысы Өзбекстанда экстремалды туризмді дамыту бағдарламасын қабылдау жөнінде тапсырма берген еді.