Пойтахтимизда Ўзбекистон-Франция ҳукуматлараро комиссиясининг савдо-иқтисодий ҳамкорлик бўйича йиғилиши ўтказилди.

Йиғилиш доирасида ўзбек-француз бизнес-форуми ҳам бўлиб ўтди. Унда йирик француз компанияларининг 15 дан ортиқ вакили иштирок этди.

Шунингдек, Франция Ғазначилиги билан Франциянинг «Геоде-Мание Ливес-Сомпагние дес» компаниялари консорциуми томонидан амалга оширилган «Белдирсой-Чимён-Нанай» «Алп-Патриарх МВК» қурилиш лойиҳасини амалга ошириш учун 47,9 миллион евро миқдорида кредит жалб қилиш тўғрисидаги шартнома, шу билан бирга, алкоголь ва тамаки бозорини тартибга солиш агентлиги билан ҳамкорликда Ингевин компаниялари консорциуми билан виночиликни ривожлантиришга доир меморандум имзоланди.

Шунингдек, «Белдирсой-Чимён-Нанай» халқаро мавсумий дам олиш масканини ташкил этишга доир лойиҳани молиялаштириш тўғрисидаги протокол тузилди. Мазкур дам олиш масканининг концепцияси ва иқтисодий модели француз «Орех Лоисирс», «Сомпагние дес Алпес», «Геоде», «Эгис», «Эподе» ва «Патриарч» компаниялари консорциуми томонидан ишлаб чиқилган.

Ушбу лойиҳанинг умумий қиймати 480 миллион долларни ташкил этиб, лойиҳа доирасида туризм инфратузилмасини ривожлантириш, жумладан, осма кўприклар ва чанғи йўлларини қуриш режалаштирилган. Келгусида туризм масканлари ҳудудида туя, эчки ва асаларичиликни ривожлантириш асосида қўшимча хизмат турларини ҳам ташкил этиш назарда тутилган бўлиб, бунда икки томонлама ҳамкорликни мустаҳкамлаш учун ўзаро яқин алоқаларни ўрнатиш тўғрисида келишувга эришилди.

Муҳайё Тошқораева,  

ЎзА