Ўзбекистон Республикаси Бош вазири ўринбосари – инвестициялар ва ташқи савдо вазири Сардор Умурзоқов “MEDEF International” Франция корхоналари ҳаракати раиси Клод Имовен бошчилигидаги ишбилармонлар делегациясини қабул қилди.

Делегация таркибига Франциянинг мамлакатимиздаги Фавқулодда ва мухтор элчиси Бушез Орелия, Франциянинг “Orano Mining”, “SUEZ”, “Voltalia”, “EDF”, “MEDEF International” ва “Alstom” компаниялари раҳбарияти киради. 

Франция компаниялари билан инвестициявий ҳамкорликни кенгайтиришнинг бугунги ҳолати ва истиқболи конструктив тарзда муҳокама қилинди. 

Айни пайт республикамизда геология-қидирув, энергетика, инфратузилма, туризм ва қишлоқ хўжалиги каби соҳаларга ихтисослашган 50 га яқин француз компаниялари фаолият юритаётгани таъкидланди. 

“MEDEF” раҳбарияти Ўзбекистон Франциянинг фаол ва ишончли иқтисодий ҳамкори эканини айтиб, мамлакатда янги лойиҳаларни амалга ошириш учун йирик француз тадбиркорларини жалб қилиш бўйича саъй-ҳаракатни фаоллаштиришга тайёрлигини билдирди. 

Учрашувда Ўзбекистоннинг тегишли вазирлик ва идоралари вакиллари муҳим соҳадаги ҳамкорлик йўналишини илгари суриш бўйича навбатдаги тадбирларни ишлаб чиқиш имконига эга бўлди. 

Мамлакатимизда лойиҳаларни амалга оширишга қизиқаётган ҳар бир франциялик ишбилармон қўллаб-қувватланиши маълум қилинди. 

Мулоқот якунида икки мамлакат тадбиркорлари алоқани мустаҳкамлаш ва аниқ келишувга эришишга қаратилган амалий ҳамкорликни давом эттиришга келишиб олинди. 

Б.Худойбердиев, ЎзА